Prokuradór Jerál Repúblika, José da Costa Ximenes. Imajen Tatoli/Dok

DILI, 05 novembru 2019 (TATOLI)–Prokuradór Jerál Repúblika (PJR), José da Costa Ximenes, relata serbisu mensál ba Prezidente Repúblika (PR), Francisco Guterres Lú Olo, kona-ba atividade prosesuál iha Ministériu Públiku (MP) durante fulan outubru, iha Palásiu Prezidente Nicolau Lobato, Dili, ohin.

Hafoin enkontru, Prokuradór Jerál Repúblika hateten durante soru-mutuk hato’o kona-ba kazu sira iha Tribunál iha outubru nia laran, hamutuk besik 500.

Nia dehan, iha nível nasionál kazu pendente tun husi 3.000, ne’e sura ona ho kazu sira hosi Gabinete Kombate Korrupsaun no Kriminalidade Organizada, iha ne’ebé Tribunál Distritál Dili kuaze prosesu hamutuk 250 mak tama, Tribubál Distritál Baucau kuaze prosesu 100 mak tama, aumenta ho Tribunál Distritál Suai no Tribunál Rejiaun Administrativa Espesiál Oé-Cusse Ambeno (RAEOA).

PJR mós rekoñese katak, durante fulan-outubru, prokuradór sira serbisu maka’as, tanba aleinde atende julgamentu sira, halo investigasaun, balun delega ba polísia kriminál sira, prokuradór sira mós konsege termina ka finaliza prosesu, kuaze 400 resin.

“Ne’e hatudu katak iha produtividade di’ak. Iha nível nasionál ita iha prosesu pendente menus husi 3.000, inklui mós Gabinete Kombate Korrupsaun no krime organizada”, PJR rekoñese.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here