Ministra Finansa en-ezersísiu, Sara Lobo Brites. Imajen Tatoli/ Egas Cristóvão

DILI, 5 novembru 2019 (TATOLI)—Ministra Finansa en-ezersísiu, Sara Lobo Brites hateten Governu kontinua defende nafatin orsamentu jerál Estadu (OJE) 2020 iha Parlamentu Nasionál nune’e bele realiza programa balun ne’ebé sei implementa.

“Asuntu ne’e ha’u hato’o ona ba Primeiru-Ministru. Importante mak Governu nia argumentu oinsá defende nafatin nia orsamentu iha Parlamentu Nasionál. Maibé, kompeténsia mós Parlamentu nian tanba ida-ne’e sira hanesan órgaun fiskalizadór nia kna’ar atu haree hosi orsamentu ne’e bele lori duni rezultadu di’ak ka lae,” dehan Sara iha Paláçio do Governo, tersa ne’e.

Nia afirma, Governu sei la tau osan arbiru. Orsamentu ho montante ne’ebé boot mai hosi atividade lubuk ida-ne’ebé Governu pretende para bele implementa hodi bele aselera prosesu balun ne’ebé Governu haree estratéjiku tenke tau duni atensaun.

“Montante boot ne’e loos duni. Ida-ne’e ita atu realiza programa balun iha tinan oin. Maibé, la signifika atu tinan sira tuir mai ita atu foti tan osan hanesan ne’e,” nia esplika.

Antes ne’e, 4 novembru 2019, Parlamentu Nasionál liuhosi bankada Governu liuliu CNRT krítika maka’as hasoru Governu hodi ameasa vota kontra orsamentu refere bainhira Governu la halo redusaun ba orsamentu ho montante biliaun $1.950 ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here