Prokuradór Jerál Repúblika, José da Costa Ximenes. Imajen Tatoli/Cipriano Colo

DILI, 05 novembru 2019 (TATOLI)—Prokuradór Jerál Repúblika, José da Costa Ximenes hateten resposta korreta ba impase polítika liuliu lista membru Governu pendente mak polítiku ho polítiku hakuak malu problema sei rezolvidu. 

“Ha’u horibainhira dehan tiha ona katak hakarak atu envolve Prokuradór Jerál Repúblika iha kazu impase polítika, ne’e error in persona aliás salah alamat. Resposta korreta mak polítiku ho polítiku hakuak malu problema rezolvidu”, Ximenes hato’o lia hirak ne’e hafoin enkontru mensál ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Nia hatutan katak Prokuradoria Jerál Repúblika (PJR) nia problema mak bainhira ninia majistradu ida la simu pose, maibé kona-ba polítiku sira la simu pose, ne’e la’ós PJR nia problema tanba PJR la’ós polítiku.

Molok ne’e, deputada bankada CNRT, Carmelita Caetano Moniz liuhusi plenária Parlamentu Nasionál kestiona katak membru Governu na’in sia indijitadu hosi Primeiru-Ministru (PM), Taur Matan Ruak to’o oras ne’e seidauk simu pose, tanba deskonfia Prokuradór Jerál Repúblika halo violasaun ba segredu Justisa, iha ne’ebé fó informasaun ne’ebé la divia fó ba Prezidente Repúblika, Francisco Guterres Lú Olo.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here