Vise Ministru Administrasaun Estatál, Abílio José Caetano. Imajen/TATOLI

DILI, 05 novembru 2019 (TATOLI)-Iha panorama Orsamentu Jerál Estadu 2019-2020 nian ne’ebé hala’o iha Komisaun sira Parlamentu Nasional nian, Vise Ministru Administrasaun Estatál, José Abílio Caetano, aposta prioridade balun ba iha polítika OJE 2020 nian atu harii uma ba komunidade kbiit laek sira iha territóriu laran.

Perante membru Komisaun A Parlamentu Nasional ba asuntu Justisa no Konstitusionál, Vise MAE José Abílio Caetano, esklarese katak, MAE mós iha programa prioridade ida tan mak polítika desentralizasaun administrativa.

“Planu prioridade ba tinan oin  mak kontinua tau polítika desentralizasaun administrativa, nune’e mós  ba programa sosiál    hanesan programa nasionál dezenvolvimentu suku (PNDS)  no programa halo uma ba populasaun  kbiit laek iha territóriu laran,” informa  Vise Ministru José Abílio Caetano, ohin, iha Parlamentu Nasional.

Kona-ba atinjimentu atu estabelese uma hira ba komunidade kbiit laek sira, Vise Ministru ne’e, hateten, total uma sei iha diskusaun laran, maibé Governu nia hakarak mak pelumenus tenke harii uma ho dignu ho kustu purvolta $7.000 to’o $15.000. tanba ne’e, MAE koloka iha proposta orsamentu 2020 ba harii uma ba kbiit laek sira millaun $50.

Kona-ba programa nasionál dezenvolvimentu suku (PNDS) prevee ona orsamentu  millaun $20 hodi implementa iha suku 452.

Hosi sorin seluk, Vise Presidente Komisaun A, Francisco de Vasconcelhos,  apresia programa Ministériu Administrasaun Estatál nian ne’e no husu atu halo planu didi’ak  garante jestaun tenke iha kontinuidade ba programa abitasaun ne’ebé aloka orsamentu boot no programa PNDS  ne’ebé antes ne’e implementa ona.

Iha orsamentu  2019 ne’ebé aloka ba Ministériu Administrasaun Estatál  tuir portal transparénsia orijen $24,258,591.00, kompromisu  $2,505,478.82 obrigasaun  $774,534.07,  atuál  $17,896,602.27, saldu $4,631,043.98 no daudaun  ne’e ezekuta ona to’o porsentu 70.6

Iha proposta orsamentu 2020, MAE propoin millaun $84-resin atu aloka ba saláriu vensimentu, bens servisu, kapitál menór, kapitál dezenvolvimentu ho transferénsia públika.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here