Prezidente Autoridade Nasional Komunikasaun, João Olívio Freitas. Imajen Tatoli/Natalino Costa

DILI, 04 novembru 2019 (TATOLI) – Prezidente Autoridade Nasionál Komunikasaun (ANC, sigla portugés), João Olívio Freitas, salienta atu prodús lei Cyber Security ka seguransa sibernétika presiza envolve instituisaun relevante sira, tanba daudaun ne’e, krime sibernétika Timor-Leste seidauk iha solusaun ne’ebé maka ideál.

“Liga ho krime sibernétika, ita seidauk iha solusaun ne’ebé maka ideál, tanba ne’e atu prodús lei, la’ós instituisaun ida ka rua nian maibé sei envolve mós PSIK, PNTL, Minístériu Justisa, Prokuradoria Jerál Repúblika, Tribunál inklui PN”, João Freitas ba Ajénsia Tatoli iha nia serbisu fatin Kaikoli, ohin.

Maibé ANC hanesan instituisaun reguladora sempre prontu nafatin atu fó pareser tékniku oinsá haree ba asunntu lei kona-ba seguransa sibernétika.

Nune’e, João Freitas husu ba públiku atu hatene liafuan Cyber Security no Cyber Crime tanba pontu rua ne’e diferente maske serbisu ne’ebé liga ba protesaun oinsá atu harii regulamentu ka sistema ida, oinsá prevene ema atu la autoriza hodi asesu ba dadus eletrónika, atu labele na’ok ema nia identidade.

“Ezemplu, ita-nia númeru ema seluk labele uza, atu asegura ida ne’e maka ita bolu Cyber Security. Ami trata ba asuntu seguransa sibernétika, saida de’it maka ami halo liga ho seguransa sibernétika, maka rejistrasaun ba sim card, hodi asegura katak, ita-boot nia númeru ne’e só ita-boot de’it maka bele uza no ema seluk labele”, dehan.

Aléinde ne’e, ANC sei estabelese liuhosi lansamentu internet exchange point (IXP) iha tempu badak, nune’e bele sentraliza konesaun IXP no ANC sei aloka IP addres ba IXP atu reguladór ANC fasíl kontrola liuhosi seguransa sibernétika. Nune’e mós ANC, antes ne’e kapasita ona timoroan sira kona-ba seguransa sibernétika.

João Freitas subliña krime sibernétika nu’udar krime ida ne’ebé liga ba ofensa sira ne’ebé komete kontra individuál no kontra grupu.

Entretantu, ANC la’ós instituisaun reguladora ba facebook nian tanba dekretu lei númeru 15/2012 la indika hodi responsabiliza ba kontrolu konteúdu.

Notísia relevante : ANC-BSSN Indonézia Sei Tulun Malu iha Seguransa Sibernétika

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here