Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D No E kona-ba OJE 2020. Imajen/TATOLI Egas Cristovao.

DILI, 04 novembru 2019 (TATOLI) – Diretór Jerál Servisu Korporativu Ministériu Finansa (MF), Joanico Pinto, hatete atu asesu ba Portál Transparénsia tenke hatene prosesu hotu nune’e hatudu saida maka ita hakarak.

 Diretór ne’e dehan hafoin halo reestrutura orsamentu ba orgánika Governu Dahituk ba Daualuk, sistema hotu atualizadu tuir orgánika foun Oitavu Governu nian.

“No refleta tuir aneksu rua no tolu lei Orsamentu Jerál Estadu en termu atualizasaun ou figura sira ne’ebé hatudu iha portál transparénsia”, Joanico Pinto afirma iha Parlamentu Nasionál, ohin, bainhira MF halo audiénsia ho Komisaun C, D, E no F kona-ba ezekusaun OJE 2019 no proposta OJE 2020 hodi responde ba preokupasaun deputadu sira katak daudaun ne’e (iha oras baluh liubá) labele asesu ba Portál Transparénsia.

Nia hatutan, atualizasaun ba portál halo diariamente sobre ezekusaun reál ohin loron nian. “Sei refleta iha portál ne’e, aban, bainhira ita loke portál iha diferensa oras 12 nia laran. Diariamente ami-nia ekipa halo hela verifikasaun ba figura sira ne’e no figura sira ne’e ha’u bele konfirma katak konsistente ida ho ida seluk liga ho sistema finanseira sira ne’ebé iha”.

“Oin nusa maka asesu, kestaun maka bainhira ita atu tama ba portál ne’e, se ita haree hodi loke primeiru no klike ba iha parte despeza nia deskreve kona-ba instituisaun hotu ne’ebé maka iha, atu tama detallu liu maka presiza ninia prosesu para bainhira klike, ninia pasu sira ne’e presiza halo tuir para ikus liuhosi prosesu ne’e bele hatudu mai ita figura ne’ebé loloos tuir ita-nia hakarak”, nia esplika.

Joanico Pinto salienta, tinan hirak liubá halo ona formasaun en jenériku ida ba tékniku sira hosi instituisaun Estadu hotu inkluzivamente hosi Parlamentu Nasionál Komisaun C (ne’ebé trata asuntu finansa públika) para oinsá dada relatóriu iha Portál Transparénsia.

Deputadu Antonino Bianco husi bankada FRETILIN konfirma katak, hatene oinsá atu asesu ba portál refere.

“Ha’u hatene muito bem hirak ne’ebé atu loke, kestaun maka portál ne’e la funsiona, realidade agora daudaun ha’u loke la funsiona ne’e ha’u maka loke hatene ka ita boot maka la hatene. Ami asesu portál ne’e uluk kedas, maibé agora loke ladi’ak”, deputadu ne’e kestiona.

Aléinde ne’e Prezidente Komisaun C, Fernanda Lay, akresenta katak portál transparénsia labele asesu.

“Deskulpa, ne’e realidade momentu, tanba ami komisaun C loroloron no durante audiénsia ami tenke foti dadus ezekusaun para hodi halo análize, maibé agora loke labele”, dehan Fernanda Lay.

Portál Transparénsia Timor-Leste iha oras balun liubá lala’o no daudaun ne’e mak públiku bele asesu ona no ezekusaun OJE 2019 atinje ona porsentu 64,8.

Notísia relevante : Ezekusaun OJE 2019 Mínimu Tebes

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here