Ministru Defeza no Ministru Interiór Interinu, Filomeno da Paixão de Jesus. Imajen/Egas Cristóvão

DILI, 4 novembru 2019 (TATOLI)—Ministru Defeza no Ministru Interiór Interinu, Filomeno da Paixão de Jesus husu ba komunidade hotu koopera ho seguransa kria estabilidade iha nasaun ne’e.

“Agora ne’e mosu ona krime organizadu barak iha fatin-fatin. Balun uza motór la’o mak sona ema entaun komplikadu uitoan. Presiza ema hotu-hotu atu tau-matan. Labele Polísia mesak tanba Polísia sei labele halo atuasaun iha umakain ida-idak. Entaun, populasaun rasik mak fó hatene sé mak la’o ka organiza grupu hirak ne’e para Polísia bele atua,” dehan Ministru Filomeno iha Paláçio do Governo, segunda ne’e.

Antes ne’e, ema deskoñesidu barak uza motorizada hakanek ema iha Dili laran inklui membru FALINTIL-Forsa Defeza Timor-Leste (F-FDTL) ida iha loron rua liubá iha Suku Bairro-Pite.

Tanba ne’e, Ministru ne’e informa, Polísia no F-FDTL sei la tolera kriminozu hirak ne’e no nia husu atu populasaun tenke koopera nafatin ho parte seguransa nune’e bele kaer ema hirak ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here