Jerente kompañia Gracia Farm Railaco, Octávia da Costa Imajen Tatoli. António Gonçalves

ERMERA, 04 novembru 2019 (TATOLI) – Kompañia Gracia Farm ne’ebé lokaliza iha Postu Administrativu Railaco, Munisípiu Ermera, hala’o ona atividade haki’ak manu hodi prodús mantolun, durante tinan 10 nia laran ona hodi responde ba merkadu nível nasionál.

Jerente kompañia, Octávia da Costa, informa kompañia ne’e to’o agora fó sebisu ona ba ema hamutuk na’in-102, kompostu husi feto 50 no mane 52.

“Kada loron prodús mantolun kaixa 263 no kada kaixa iha mantolun 360 iha laran. Difikuldade ne’ebé enfrenta maka bainhira mantolun ema la foti no manu ema la sosa, tanba lolos manu ne’ebé ita prodús mantolun kuandu tuan ona tenke fa’an maibé difísil tanba ema la hola manu”, tenik ba Agência Tatoli, segunda ne’e.

Atividade iha Gracia Farm Railaco. Imajen Tatoli/António Gonçalves

Tuir jerente kompañia nasionál ne’e, bainhira produtu ladún folin iha merkadu, tenke buka jeitu hodi produtu ne’e bele to’o merkadu tanba investimentu iha produsaun ne’e boot.

“Karik demanda husi loja barak liu entaun ba loron ida ninian bele fa’an hotu maibé agora la’e tanba konforme ema husi loja ne’e husu hira”, nia akresenta.

Tuir Octávia, kompañia ne’e agora daudaun hatan de’it iha demanda merkadu husi Dili.

“Ami nia agen iha Dili de’it, inan-aman sira ne’ebé fa’an sasan maka ba hola fali iha loja sira maka ba fa’an fali”, nia dehan tan.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here