Diretór Ezekutivu FONGTIL, Daniel Santos do Carmo. Imajen Tatoli/Cipriano Colo

DILI, 04 novembru 2019 (TATOLI)—Forum Organizasaun Naun Governamentál Timor-Leste (FONGTIL) transformadu hosi ONG Fórum, estabelese iha tinan 1998 hosi organizasaun 14 kompostu hosi ETADEP, FOKUPERS, YAYASAN HAK, YAYASAN Yahula, Halerai Hamutuk ho ONG Internasionál balun.

Diretór Ezekutivu FONGTIL, Daniel Santos do Carmo hateten hafoin ukun-aan iha tinan 2000, transforma ONG Fórum ba fali Fórum ONG Timor-Leste ne’ebé ho nia transformasaun loloos iha 2018 liuhosi kongresu.

Tuir dadus ne’ebé iha, dezde 1998, FONGTIL iha membru ONG nasionál no Internasionál. To’o ukun-aan iha 2002, FONGTIL iha membru hamutuk 856.

Diretór ne’e hatutan númeru ida-ne’e komesa tun tanba dezde 2000 to’o ohin loron, tun no timoroan sira ne’ebé harii ONG deside taka no la hala’o ona serbisu tanba ajénsia internasionál barak ne’ebé fó apoiu, husik Timor tanba enfrenta krize mundiál  finanseiru iha 2006.

“Tanba ne’e, númeru ONG ne’ebé ita atualiza iha 2018 to’o outubru tinan ne’e, iha ONG hamutuk 339. Hosi númeru ne’e, ONG internasionál hamutuk 27, nasionál no lokál  hamutuk 312”, nia relata ba Agência Tatoli iha nia kna’ar fatin, Caicoli, Dili, segunda ne’e.

Daniel esplika mós katak baibain hanaran ONG lokál tanba hala’o serbisu iha munisípiu ida de’it, no ONG nasionál sira hala’o serbisu liu munisípiu ida,  no mós ONG internasionál tanba sira-nia baze ne’e iha sira-nia rai, no mai hala’o serbisu iha Timor-Leste.

Kona-ba kritériu prinsipál  bainhira hakarak atu harii ONG, diretór ezekutivu ne’e esplika, tenke naun lukrutiva, tenke naun partidáriu, labele serbisu ba grupu partidu polítiku ruma, tenke independente, tenke iha ninia fatin, edifísiu, programa, planu,  ho ninia estrutura.

Kritéria seluk mak ONG ida hala’o serbisu iha munisípiu maibé ho programa ne’ebé kontribui ba dezenvolvimentu nasionál, liuliu ajenda sira ne’ebé tau iha Planu Estratéjiku Dezenvolvimentu Nasionál.

“FONGTIL ninia natureza hanesan mahon, nune’e ezisténsia no nia papél importante mak oinsá fó atendimentu ba membru sira”, dehan Daniel.

Kna’ar importantes atu fasilita membru, Daniel sita, FONGTIL iha mandatu haat (4), mak hanesan,halo advokasia, baibain halo advokasia ba governu  liga ho desizaun públiku, boa governasuan, interese estadu, ba direitus umanus no seluk tan.

Aleinde ne’e, FONGTIL mós halo advokasia oinsá apoiu membru sira, kona-ba advokasia iha infraestrutura,  bee-moos, saneamentu, agrikultura no seluk-tan.

FONGTIL ninia papél segundu mak kapasitasaun ba membru sira iha aspetu oioin depende mós ba nesesidade membru sira-nian, liuliu kapasitasaun oinsá reforsa rekursu umanu iha organizasaun halo sai forte, kapasitasaun iha área administrasaun finansa, kona-ba polítika ezekusaun programa no jestaun ba organizaun ne’e rasik.

Papel terseiru mak, koordenasaun  hosi leten ba kraik, no kraik ba leten, hosi kraik ba leten, koordena entre FONGTIL ninia membru sira ho órgaun soberanu sira, no koordenasaun ida mak FONGTIL ba nia membru sira atu halo advokasia ba desizaun públiku,  liuliu oinsá FONGTIL bele iha espasu atu  fó informasaun ba orsamentu jerál Estadu no pareser balun ne’ebé dalaruma Parlamentu husu liga ho lei balun no seluk-tan.

Daniel temi katak kna’ar prinsipál  ikus liu hosi FONGTIL mak  fahe informasaun, iha ne’ebé FONGTIL hanesan sentru no bainhira Governu hakarak atu halo soru-mutuk ho sosiedade sivíl, FONGTIL fasilita.

“Mandatu haat ne’e mai hosi Assembleia Jerál, ne’ebé partisipa hosi membru sira hotu ho ne’ebé realiza kada tinan lima no entrega direta hosi Board,  ezekutivu sira mak ezekuta”, nia hateten.

Daniel relata liután, membru FONGTIL ativu ho númeru ne’ebé mensiona, %75 hala’o atividade iha área dezenvolvimentu ekonomia ho agrikultura. Pursentu 10 mak serbisu iha área advokasia, sira halo advokasia ba desizaun públiku no %1 mak hala’o serbisu iha dezenvolvimentu komunitária hanesan dada bee-moos, redusaun ki’ak, konstrusaun ba infraestrutura báziku ho parseria oioin.

FONGTIL iha relasaun internasionál lubuk ida hanesan halo relasaun di’ak ho ASEAN People Forum, ne’ebé FONGTIL apoiu adezaun Estadu Timor-Leste ba ASEAN no Daniel dehan,  oras ne’e daudaun FONGTIL lidera hela Fórum Sosiedade Sivíl CPLP, parseria ho ONG Fórum sira iha Austrália, Portugál no CPLP.

“FONGTIL mós iha rede internasionál oioin, hanesan membru rede plataforma sosiedade sivíl ba prevensaun konflitu ho nia sentru iha Den Haag Olanda, FONGTIL mós sai membru ba rede  Asian Development Aliance ( ADA) hanesan rede ida ne’ebé ko’alia liu kona-ba haforsa demokrasia iha Ázia”, nia esplika.

Aleinde rede sira hosi rai li’ur, FONGTIL mós  serbisu hamutuk ho rede barak iha rai laran mak hanesan Rede HASATIL ne’ebé foku liu ba agrikultura iha rai laran, iha mós rede Core Group Transparency, Rede Feto, Rede Edukasaun,  Rede ba Bee no Saneamanetu, Rede ba Prevensaun Dezastre, no rede ne’ebé foin atu inisia mak Rede ba Prevensaun Tuberoluze, serbisu hamutuk mós ho Rede Defisiente.

Fundu úniku ba FONGTIL, Daniel esplika, primeiru mai hosi membru sira tanba kada tinan membru sira sempre selu sira-nia kuota, ba ONG nasionál no lokál sira kada tinan $60 no ONG internasionál sira kada tinan selu kuota $300.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here