Diretór Ezekutivu Fórum Organizasaun Naun Governamentál Timor-Leste (FONGTIL), Daniel Santos do Carmo. Imajen Tatoli/Cipriano Colo

DILI, 04 novembru 2019 (TATOLI)—Diretór Ezekutivu Fórum Organizasaun Naun Governamentál Timor-Leste (FONGTIL), Daniel Santos do Carmo esplika fundu úniku hosi FONGTIL mai hosi membru sira tanba kada tinan sempre selu kuota.

Nia dehan, ONG nasionál no lokál sira kada tinan selu $60 no ONG internasionál sira kada tinan selu kuota $300.

Ida-ne’e hanesan fundu inan hodi implementa FONGTIL nia programa sira, maibé Daniel hateten, fundu ne’e la to’o, tanba ne’e FONGTIL tenke halo proposta hodi buka no tinan ne’e hetan hosi fundu sosiedade sivíl iha Gabinete Primeiru-Ministru ho montante $400.000.

“Ezekusaun orsamentu ne’e foin atinje %75, tanba ita-nia sistema transferénsia públika ne’ebé tuir padraun Governu nian, nune’e ami mós dalaruma tenke hein tanba sistema ne’e la fásil hanesan ohin ita ko’alia aban osan mai ona, la’e. Presiza mós tempu iha sistema administrasaun Estadu nian”, Daniel esplika ba Tatoli iha nia serbisu fatin, Caicoli, ohin.

Diretór ne’e esplika liután, FONGTIL uza fundu ne’e hodi apoiu serbisu iha rai laran mak halo auditoria sosiál.

“Ita asina memorandu ida ho VI Governu lidera hosi Primeiru-Ministru, Rui Maria de Araújo, ne’ebé fó espasu ba FONGTIL atu halo auditoria sosiál ba área edukasaun, saúde, infraestrutura bázika no agrikultura. Programa social audit ne’e kontinua la’o to’o VIII Governu, hetan apoiu hosi Gabinete Primeiru-Ministru liuhusi Fundu Sosiedade Sivíl no tinan ne’e iha ONG nasionál 11 mak halo auditoria sosiál iha área haat ne’ebé temi”, Daniel subliña.

Nia hatutan, serbisu auditoria ne’e atu haree kona-ba atinjimentu polítika indikadór sira ne’ebé Governu estabelese ona.

Diretór ne’e fó ezemplu ida mak halo auditoria ba Planu Estratéjiku Dezenvolvimentu Nasionál (PEDN) ne’ebé Governu iha katak, to’o 2020, populasaun ho %87 asesu ona bee-moos no saneamentu adekuadu.

“Auditoria sosiál ne’e atu haree katak oinsá bee-moos no saneamentu iha área remota ne’e la’o ona ka seidauk. Realidade hatudu katak dezde Primeiru Governu to’o agora, kestaun boot ne’ebé sai preokupasaun mak área hirak ne’e, tanba kada tinan alokasaun orsamentu ki’ik liu no seidauk bele atinje”, nia relata.

Orsamentu ne’e mós FONGTIL uza hodi halo auditoria ba distribuisaun tratór no fini hosi Governu ba povu atu hasa’e produsaun hare iha rai laran, ida ne’e Daniel dehan, realidade hatudu katak seidauk atinje.

“FONGTIL mós halo auditoria iha área edukasaun, liuliu edukasaun inkluzivu (labele husik ema ida iha kotuk), liga ho fasilidade asesível ba ema ho defisiénsia iha eskola públika sira.

Daniel hatutan bainhira iha auditoria ne’e deskobre katak iha abuzu podér, mal administrasaun, korrupsaun no nepotizmu, FONGTIL halo de’it rekomendasuan ba instituisuan Estadu hanesan Inspesaun Jerál Estadu (IJE), Komisaun Antí Korrupsaun (KAK), Provedoria Direitu Umanu no Justisa (PDHJ-sigla portugés), atu bele halo investigasaun.

Tuir nia, kona-ba rezultadu auditoria ba tinan ne’e seidauk to’o elaborasaun relatóriu finál tanba ekipa auditoria foin to’o iha faze análiza dadus.

Nia esplika, lala’ok auditoria sosiál ne’ebé hala’o sempre liuhusi faze tolu mak hanesan, primeiru mak, halo enkontru preliminária iha munisípiu atu sensibiliza autoridade sira katak ekipa sei halo auditoria iha área ida-ne’e.

Faze daruak mak, ekipa halo kolesaun dadus, no terseiru tama iha analiza dadus no ikus liu mak ba iha validasaun dadus iha munisípiu.

FONGTIL mós iha programa kapasitasaun, no ba tinan ida-ne’e Daniel informa katak foku liubá sustentabilidade ONG ne’ebé baibain bolu dehan planu negósiu, tanba ONG presiza ida-ne’e, ho nia lukru atu bele sustenta ninia ezisténsia ba tempu naruk.

“Ne’e FONGTIL halo kapasitasaun ba membru sira iha parte oeste, leste inklui Dili ho Rejiaun Administrativa Espesiál Oé-Cusse Ambeno (RAEOA)”, Daniel salienta.

Kona-ba advokasia, Diretór ezekutivu relata, tinan ne’e FONGTIL iha fórum haat, mak hanesan fórum diálogu ba edukasaun, fórum diálogu ba saúde, fórum diálogu ba soberania no seguransa ai-han, no fórum diálogu ba boa governasaun.

“Ita mós halo advokasia iha munisípiu mak hanesan soru-mutuk regulár entre ONG sira ho Governu lokál atu dudu prosesu desentralizasaun, oinsá mak ONG ativu tau-matan ba prosesu desentralizasaun no ita hakarak prepara ONG sira atu ativu iha munisípiu nune’e aban bainrua sira bele halo parseria ki’ik ida iha munisípiu, bele halo mós krítika iha munisípiu, hamenus tensaun sira ne’ebé bele akontese hanesan korrupsaun, koluzaun no nepotizmu”, Daniel hakotu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here