Diretór Laboratóriu no Dosente Klínika Kafé Timór no East Timor Coffee Institute (ETCI), Adérito Nunes. Imajen Tatoli/António Gonçalves

ERMERA, 04 novembru 2019 (TATOLI) – Klínika Kafé Timór no East Timor Coffee Institute (ETCI) hanesan institutu ida no fatin prosesamentu kafé ne’ebé fó biban ba estudante sira hodi bele loke mikro empreza bainhira ramata estudu ho sira ninia aproveitamentu.

Diretór Laboratóriu no Dosente iha Klínika Kafé Timór no East Timor Coffee Institute (ETCI), Adérito Nunes, hateten bainhira estudante sira ramata estudu, iha ona parseiru husi tékniku vokasionál maka bele serbisu hamutuk tanba konsidera iha área agrikultura seidauk iha industria ne’ebé kompatível atu estudante sira bele asesu ba merkadu no kompete.

“Entaun sira tenke kria rasik hanesan grupu kiik (mikro empreza) ba negósiu hanesan kafé, nune’e bainhira sira buka serbisu maka laiha ona entaun sira tenke kria rasik grupu oinsá bele hasa’e kualidade kafé”, nia tenik ba Agência Tatoli iha ETCI, Gleno, segunda ne’e.

Nia haktuir, eskola ne’e iha tinan 2012 foin hetan akreditasaun institusionál husi Ministériu Edukasaun Ensinu Superiór, hafoin harii iha tinan 2003 hanesan Akadémiku Agrikultura no hetan avaliasaun husi ministériu iha tinan 2009.

Dosente ne’e akresenta, bainhira institutu ne’e harii dahuluk, hahú ho fakuldade agrikultura de’it, hafoin iha tinan 2009 to’o 2012 iha hanoin atu koko fakuldade edukasaun no ekonomia kontabilidade, entaun daudaun ne’e iha fakuldade tolu no departementu 10.

“Hanesan iha área agrikultura, ita la’ós produz sira oinsá bele hatene matéria de’it maibé tenke hanorin sira hodi implementa teoria porsentu 40 no prátika porsentu 60”, nia akresenta.

Adérito Nunes informa, dosente iha institutu ne’e hamutuk 32 maka permanente no totál ne’ebé akumula ho dosente kontratadu hamutuk 78.

Enkuantu estudante sira ne’ebé rejista kada tinan iha institutu ne’e maka entre 150 to’o 300.

Iha prosesu aprendizajen, tuir dosente ne’e depende ba vontade kada ema atu simu matéria sira no ninia aproveitamentu rasik.

“Kestaun fasilidade la sai problema tanba dala barak ema nia hakarak ita bele oferese maibé dala barak buat ne’ebé kualidade maka la tuir nia hakarak bele sai problema. Kestaun kompetisaun ba kualidade ha’u hanoin hanesan”, nia salienta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here