Ai-kameli. Foto/Alfándega.

DILI, 04 novembru 2019 (TATOLI) – Diretór Jerál Autoridade Aduaneira (AA/Alfándega) interinu, Julião J. Fernandes, hatete ekipa intelijénsia Alfándega koopera ho Polísia Eskuadra Zumalai, Munisípiu Kovalima,  no task force Suai halo apreensaun ba Ai-Kameli kategoria klase ida ho tonelada ida iha área Lolotoe, Munisípiu Bobonaru.

“Ita-nia operasaun konjunta foin lalais ne’e (28/10/2019) konsege apreende (foti) Ai-Kameli hamutuk tonelada ida iha parte Lolotoe no objetu sira ita asegura ona. Momentu ne’e, halo hela relatóriu hodi submete ba Ministériu Públiku hodi kontinua prosesu tuir lei”, Julião afirma ba Tatoli iha Parlamentu Nasionál, ohin.

Nia hatutan ekipa task force deteta katak Ai-Kameli lori husi negosiante timoroan balun  liuhusi dalan ilegál bá Indonézia.

“Ha’u hanoin hahalok sira hanesan ita presiza fó nafatin hanoin ba sira no divulga nafatin informasaun ba sira para depois sira mós sei kontribui oinsá atu halo prosesu selu taxa ba Estadu”, katak.

Nune’e, diretór ne’e salienta AA sei la tolera sidadaun ne’ebé de’it mak tenta atu estraga ai-horis protejidu no sai hanesan símbolu nasionál ba identidade Timor-Leste.

“Ami-nia ekipa sei kontinua no prontu atu halo operasaun ba kualkér atividade ilegál iha fronteira sira atu tuir dala legál atu selu taxa ba kofre Estadu”, kompromete.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here