Diretór Nasionál Ensinu Rekorrente (DNER), Miguel Martins. Imajen: Tomé Amado

DILI, 04 novembru 2019 (TATOLI)-Diretór Nasionál Ensinu Rekorrente (DNER), Miguel Martins garante, 2020 DNER sei aloka  fundu ho montante rihun ualu ba SKA-Sentru Komunitáriu aprendizajen  ualu ne’ebé eziste ho programa formasaun vokasionál.

Durante ne´e DNER foka liu ba programa ensinu rekorrente nian ne’ebé ho intensaun diploma formál ba partisipante sira  hodi bele kontinua sira-nia estudu iha nivel tuir mai.

Maibé, tinan oin alende programa ensinu rekorrente ne’e hala’o ho matéria formál sira DNER mós ajusta ona programa formasaun vokasionál ba partisipante sira.

“Ita haree husi esperiénsia tanba partisipante sira ne’e mai husi background ida ne’ebé husik tiha sira-nia edukasaun formál. Tan ne’e dala barak difisil ita atu konvense sira, entaun maneira formasaun vokasionál ne’e atu gaña fali sira-nia vontade atu  aprende fali sistema seluk,” hateten Diretór Miguel Martins ba Ajénsia TATOLI iha nia kna´ar fatin, edifísiu ensinu rekorrente Vila Verde, Dili, ohin.

Bazea ba kompromísu ne´e, ezekutivu Miguel Martins akresenta katak parte DNER alista iha SKA ualu mak to’o agora sei ejisti hela. Tan ne’e kada SKA sei hetan orsamentu rihun ida hodi realiza formasaun vokasionál ne’e rasik.

Kada SKA ualu ne’e sira mak jere rasik orsamentu inklui kria rasik planu ba formasaun.

“Ami apoiu de’it orsamentu maibé planu mai husi SKA rasik la´ós husi ami atu nune’e sira mak bele identifika hakarak atu loke formasaun saida bazeia ba nesesidade no potensialidade iha fatin refere”.

Miguel esplika  katak kada SKA ida hetan de’it rihun ida ne’e konsidera orsamentu ki’ik maibé ida ne’e mak DNER koko atu eduka kuandu reponsavel SKA sira mak iha duni kapasidade atu jere orsamentu ne’e ho didiak, sei fo konfiansa liután ba Governu. “Maibé orsamentu bo’ot mak programa ida mós la realiza saugate de’it”.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here