Prezidente Autoridades Nasional Comunicação ( ANC) João Olivio Freitas. Imajen/Tatoli.

DILI, 04 novembru 2019 (TATOLI) – Prezidente Autoridade Nasionál Komunikasaun (ANC-sigla portugés), João Olívio Freitas, informa inísiu 2019 to’o outubru, ANC kobre reseita hamutuk $904,418.60 hosi operadór Timor Telecom, Telemor no Telkomcel.

“Montante reseita atuál ne’ebé tama ona ba konta ANC nian, to’o iha dia 25 outubru 2019, maka $904,418.60”, relata Prezidente ANC ba Ajénsia Tatoli iha nia kna’ar fatin Kaikoli, ohin.

Tuir João Olívio katak fonte reseita iha rua maka hanesan regulatory fees no application processing fee.

Nia esplika regulatory fees maka taxa ida ne’ebé kada tinan operadór tenke selu ba ANC liuhosi operadór ida-idak nia reseita brutu ka pendapatan kotor ho objetivu atu finansia atividade ka programa anuál ANC nian, bazeia ba dekretu lei númeru 15/2012, artigu 13, parágrafu tolu katak ANC sei deside persentajen hira husi operadór sira-nian reseita brutu maka kada operadór tenke selu ba ANC iha ne’ebé persentajen másimu ka 2% ba tinan 2019.

Nune’e mós application processing fee, maka taxa ida ne’ebé aplikante sira sei selu ba ANC atubele prosesa sira-nia pedidu ba lisensiamentu utilizasaun frekuénsia rádiu ba servisu rádiu komunikasaun sira ne’ebé maka la hanesan, ezemplu, lisensiamentu utilizasaun frekuénsia rádiu ba estasaun rádiu no televizaun, rádiu amadór, rádiu HT, rádiu aeronáutiku, rádiu marítimu, Very Small Aperture Terminal (VSAT) no earth station.

Daudaun ne’e, ANC hein hela pagamentu faze daruak ba regulatory fees 2018 husi operadór tolu maka Timor Telecom, Telemor no Telkomcel no loron ikus liu ba pagamentu ne’e iha 31 dezembru 2019.

“Ba operadór sira ne’ebé la konsege kompleta pagamentu ba faze daruak nian to’o iha 31 dezembru 2019, ANC sei aplika multa 2% ba operadór ida ne’e”, realsa.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here