Fatin Maternidade iha Sentru Saúde Manufahi. Imajen Tatoli/Nelia Fernandes

MANUFAHI, 29 outubru 2019 (TATOLI)—Diretora Sentru Saúde Manufahi, Florencia Corte-Real Tilman hateten, iha Sentru Saúde Manufahi, fatin partu iha rua de’it no kloot. Tanba ne’e, difikulta pasiente sira ne’ebé tama mai partu.

“Kuandu ema tama mai partu, ida hotu tiha tun tiha mak ida sa’e filafali. Ne’e duni, presiza alarga tan fatin ne’e,” katak Florencia ba Agencia Tatoli iha nia kna’ar fatin, Bairru Nuu-Laran, Postu Administrativu Same, Munisípiu Manufahi, tersa ne’e.

Nia informa, iha tinan kotuk, sira hato’o ona pedidu ba Ministériu Saúde atu alarga sala maternidade ne’e, maibé to’o agora seidauk hetan fundu.

“Situasaun ne’ebé ami infrenta mak kuandu ema mai partu hotu, ami tenke tau fali kama iha li’ur hodi ema mai toba. Ita sente triste tanba ema liu ba mai haree hela. Ho kondisaun ne’e mak ami hato’o ona pedidu ba Ministériu Saúde atu bele solusiona,” Florencia haklaken.

Iha parte seluk, Koordenadora Departamentu Maternidade Sentru Saúde Manufahi, Justa Pereira subliña sira iha internamentu ho maternidade ne’e troka malu atu ba halo atendimentu ba iha Postu Saúde.

Koordenadora Departamentu Maternidade Sentru Saúde Manufahi, Justa Pereira. Imajen Tatoli/Nelia Fernandes

“Postu Saúde balun laiha profisionál saúde atu atende inan-partu sira. Tanba ne’e, ami halo Klínika Móvel iha fulan ida dala rua,” nia haktuir.

Justa informa katak profisionál saúde iha maternidade hamutuk na’in 8 de’it, tanba ne’e kuandu halo rotasaun ne’e susar.

“Kuandu pasiente barak mak mai partu, ne’e ami hasoru difikuldade tanba profisionál saúde la to’o. Se partu mak normál de’it, pesoál saúde ida bele atende. Maibé, kuandu iha problema, entaun ema ida de’it labele atende. Entaun, ita tenke bolu ema ida-ne’ebé iha Sentru Saúde ba fali iha maternidade, depois loron nia tenke mai serbisu filafali. Ida-ne’e mak ami infrenta,” nia informa.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here