Plafon hosi ESTV-COVEM la konduzivu (dodok ona). Imajen Tatoli/Domingos Piedade Freitas

MANUFAHI, 30 outubru 2019 (TATOLI)—Adjuntu Dirétor Eskola Téknika Vokasionál Combatentes e Veteranos Manufahi (ESTV-COVEM), Aleixo Gutteres, informa ESTV-COVEM nu’udar eskola privada ho totál alunu hamutuk 205, maibé infraestrutura ne’ebé atu suporta prosesu aprendizajen iha eskola refere mak ladi’ak ona hanesan plafon, kalén kuak, eletrsidade la funsiona, laiha bee-moos no laiha livru.

Adjuntu Dirétor Eskola Téknika Vokasionál Combatentes e Veteranos Manufahi (ESTV-COVEM), Aleixo Gutteres. Imajen Tatoli/Domingos Piedade Freitas

“Oras ne’e daudaun iha sala neen mak kontinua uza ba prosesu aprendizajen maibé kondisaun iha sala balun mak la permite ona dezde tinan 2014 kedas”, nia tenik ba Agência TATOLI, iha nia kna’ar fatin, ESTV-COVEM, Postu Administrativu Same, Munisípiu Manufahi, kuarta ne’e.

Nia haktuir, problema ida-ne’e afeta tebes ba prosesu aprendizajen iha tempu udan tanba udan tama iha sala laran.

Fasilidade aprendizajen, Aleixo hateten, laiha problema tanba Governu apoiu ona meza mo kadeira, nune’e fasilita di’ak liután alunu sira.

Nia hatutan, iha kursu tolu mak aplika iha eskola ne’e mak hanesan Turizmu Otelaria, Konstrusaun Sivíl no Informátika. Maibé, entre kursu tolu ne’e, Turizmu Otelaria mak sei infrenta problema oioin no kuaze sasán prátika nian lori hosi uma.

Kona-ba profesór sira ne’ebé hanorin iha eskola ne’e, Aleixo dehan, profesór hamutuk 23 kompostu hosi feto 14 no mane na’in 9 ho grau akadémika lisensiatura.

Nia esplika, profesór sira ho estatutu voluntáriu ne’e hetan saláriu hosi propina eskola nian tuir padraun ne’ebé adota hosi Sekretaria Estadu Formasaun Profisionál no Empregu (SEFOPE).

Hatán ba kestaun ne’e, Diretór Edukasaun Munisípiu Manufahi, Trinito Sarmento konsidera ESTV-COVEM ne’e eskola privada hosi veteranu sira-nian, maibé edifísiu ne’ebé mak sira (ESTV-COVEM) uza ne’e propriedade Estadu. Tanba ne’e, tuir nia, loloos hakarak loke eskola tenke iha rai rasik.

“Problema mak eskola ne’e eskola privada. Dalaruma ami rekomenda ba Ministériu Edukasaun atu tau-matan mós ba iha eskola refere maibé depende ba ministériu. Ami hanesan edukasaun munisipál ne’e, laiha kompeténsia direta atu dehan tulun ka la tulun,” nia esklarese.

Kona-ba profesór kontratadu, Trinito haklaken, atu sai fali funsionáriu permanente kabe ba edukasaun nasionál no ESTV-COVEM nia kompeténsia.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here