Diretór Edukasaun Munisípiu Manufahi, Trinito Sarmento. Imajen Tatoli/Domingos Piedade Freitas

MANUFAHI, 30 outubru 2019 (TATOLI)—Númeru estudante iha Eskola Bázika Sentrál (EBC-sigla portugés) Diligencia Same, kada tinan sa’e ba beibeik. Kada sala ho totál alunu atinje 50 to’o 70.

“Ko’alia kona-ba kondisaun sala EBC Deligencia, totál sala aprendizajen hamutuk 12. Entre sala 12 ne’e, sala 1 mak oferese ba iha kartóriu profesór no reuniaun. Kada sala númeru alunu bele to’o 50 no 70”, tenik Xefe Gabinete EBC Diligencia, Alexandre das Neves, ba Agência TATOLI, iha ninia kartóriu, iha Aldeia Tomnana, Suku Letefoho, Postu Administrativu Same, Munisípiu Manufahi, ohin.

Nia rekoñese, loloos, númeru estudante iha kada sala ne’e labele barak liu maibé tanba kauza hosi sala aprendizajen mak limitadu.

Alexandre hatutan, kona-ba fasilidade hanesan meza no kadeira laiha problema, nune’e la prejudika ba kualker atividadedes eskola, saneamentu hanesan bee-moos no sintina mós kuaze di’ak hotu, maibé tempu bailoron mak araska uitoan tanba bee maran.

Alexandre kontente ho Governu Sentrál liuhusi Ministériu Edukasaun ne’ebé kontinua fó apoiu orsamentu no aihan hanesan foos hodi halo menu oioin hanesan sasoro, koto, foremungu, na’an no etu ba labarik sira hodi konsumu.

Kona-ba estatutu profesór sira, tuir nia, laiha problema tanba profesór na’in 19 kompostu hosi feto 10 no mane 9 ne’e funsionáriu públiku. Iha mós profesora na’in haat mak ho estatutu sei kontratadu.

Alexandre kontinua rekomenda ba iha Governu presiza aumenta infraestrutura atu lalika prejudika ba númeru alunu iha kada sala.

Entretantu, Diretór Edukasaun Munisípiu Manufahi, Trinito Sarmento rekoñese katak defaktu númeru estudante iha EBC Diligencia kontinua sa’e ba beibeik tanba eskola ne’e lokaliza iha parte sentru Manufahi.

Tanba ne’e, nia tenik, foin daudaun, husi parte Edukasaun Munisípiu nian mós halo ona observasaun direta katak EBC Diligencia presiza aumenta duni sala aula atu minimiza númeru alunu iha kada sala.

“Ha’u hanoin foin daudaun husi parte Edukasaun Munisípiu Manufahi nian halo ona proposta ba iha Administrasaun Munisípiu no Ministériu Edukasaun atu bele tau mós orsamentu para bele rezolve lalais problema ne’e,” Trinito haktuir.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here