DILI, 30 outubru 2019 (TATOLI) – Prezidente Repúblika (PR), Francisco Guterres ‘Lú Olo’, rekoñese vizita Papa João Paulo II iha Timor-Leste iha loron 12 outubru 1989, iha Tasi Tolu, lori esperansa ba Frente Armada hodi laran metin liután katak loron ida sei realiza mehi ba ukun rasik-aan.
“Ha’u aproveita fó hanoin katak, ami kombatente sira iha Frente Armada hasa’e duni ami-nia esperansa no ami-nia fiar katak, ami sei fila ba iha ida-idak ninia uma-kain no moris ho hakmatek no ksolok. Vizita husi Amu Papa João Paulo II, halo ami hakbiit-aan liután katak mehi ba ukun-aan sei akontese duni no hametin liután sentidu solidariedade no espíritu fraternidade entre ita timoroan”, tenik Lú Olo iha Misa Agradesimentu tinan 30 vizita Papa João Paulo II iha Tasi Tolu, kuarta ne’e.
Nia dehan, Povu no Estadu Timor-Leste sente gratidaun ba misaun Papa João Paulo II, tanba ne’e, Governu dahuluk deside kedas harii monumentu istóriku iha foho leten Tasi-Tolu nian atu fó hanoin ba mundu kona-ba jestu simbóliku esperansa husi Amu Papa João Paulo II ba timoroan hotu-hotu tantu katóliku ka la katóliku.
“Ho naran Estadu Timor-Leste nian, Prezidente Repúblika hakarak agradese mós ba Igreja Katólika ne’ebé ajuda hametin Timor-Leste nia Rezisténsia Kulturál durante tinan 25 no fó mós mahon no naroman ba timoroan hotu bele hakbiit-aan nu’udar povu ho identidade rasik to’o ohin loron”, nia akresenta.
Tanba ne’e, Xefe Estadu salienta, ho buat hirak ne’e hotu maka to’o hin loron Timor-Leste hetan ona fatin no kbiit iha komunidade internasionál nu’udar nasaun ida ho direitu no obrigasaun iha Organizasaun Nasaun Unida (ONU) hanesan nasaun seluk.
Nune’e, iha oportunidade ne’e, PR hato’o votu ba Sua Santidade Papa Francisco atu iha forsa no saúde hodi kontinua hala’o ninia misaun lori pás no domin ba mundu tomak.
“Iha ita hotu nia orasaun, ita sei husu Nai ninia tulun ba Sua Santidade Papa Francisco no líder relijiozu hotu-hotu ne’ebé kumpre sira-nia misaun hodi haksolok ita hotu ho forsa espirituál atu moris ho domin no dame”, nia hakotu.
Jornalista : Cipriano Colo
Editór: Xisto Freitas
