Ambiente fa’an sasán iha Merkadu Same, Manufahi. Imajen Tatoli/Nelia Fernandes

MANUFAHI, 30 outubru 2019 (TATOLI)—Vendedór sira iha Merkadu Same, Munisípiu Manufahi, hahú selu impostu ba Aitoridade Munisipál Manufahi. Kada vendedór kontribui osan $1-$1.50. Objetivu hosi kontribuisaun ne’e atu garante sustentabilidade fasilidade merkadu hanesan harii fatin, bee-moos, fatin fa’an no seluseluk tan.

“Orsamentu ne’ebé negosiante sira  kontribui iha kada fulan ne’e atu garante sustentabilidade fasilidade merkadu. Ida-ne’e autoriza hosi Autoridade Administrasaun Munisipál,” Jestór Merkadu Same, Adelino da Silva ba Agência Tatoli iha nia kna’ar fatin, Nuu-Laran, Postu Administrativu Same, Munisípiu Manufahi, kuarta ne’e.

Maski nune’e, nia haktuir, difikuldade ne’ebé vendedór sira hasoru mak negosiante sira hadau malu fatin fa’an sasán.

“Problema ne’ebé negosiante sira infrenta mak hadau malu fatin fa’an sasán tanba fatin la sufisiente. Fatin ne’e ami fahe—balun hetan metru ida no balun hetan metru rua. Difikuldade seluk mak bee laiha. Haris fatin ne’e Estadu kria ona, maibé bee la tama entaun ami taka tiha. Tanba kuandu ita loke haris fatin, ita tama merkadu ladi’ak (iis),” nia informa.

Ambiente fa’an sasán iha Merkadu Same, Manufahi. Imajen Tatoli/Nelia Fernandes

Nia dehan, negosiante permanente iha merkadu refere hamutuk 200 kompostu hosi negosiante modo no loja.

Iha fatin hanesan, vendedora Ilda Ramelau Tilman hateten kompradór (ema ne’ebé hola sasán) depende ba evolusaun. Kuandu iha seremónia ruma ka festa, lia mate no lia moris, tuir nia, sasán folin tebes tanba loron ida sira bele hetan osan $30-$40. Maibé, kuandu laiha seremónia, loron ida sira hetan de’it $5-$10.

Ilda mós hateten katak nia apoiu polítika impostu tanba ho impostu ne’e mak bele halo manutensaun ba fasilidade merkadu.

Aleinde ne’e, vendedora Teresa de Jesus Marçal mós rekoñese katak sasán ne’ebé fa’an iha merkadu ema sosa hanesan sorte de’it—dalaruma iha festa ruma, entaun sasán folin. Kuandu laiha festa, loron ida hetan de’it $1-$2. Ne’e atu sosa hahán la to’o.

“Sasán ne’e la folin ida, tanba ema la hola. Di’ak ida ita fa’an loron rua-tolu mak ema hola. Lae ema la hola. Sasán dodok ita lori ba soe tiha de’it,” Teresa tenik.

Koopera ho Jestór Merkadu

Entretantu, Administradór Munisipíu Manufahi, Arantes Isaac Sarmento, husu ba vendedór sira atu koopera ho Jestór Merkadu Manufahi atu kria kondisaun ne’ebé mak di’ak liuliu ambiente moos no saudável.

Nia mós apela ba vendedór sira atu kontribui impostu nune’e bele garante funsionamentu merkadu no mós selu ba pesoál sira ne’ebé hamoos fo’er no tula fo’er.

Jornalista: Nelia Fernandes/Domingos Piedade Freitas

Ediór: Xisto Freitas

HAKEREK NO HATÁN

Please enter your comment!
Please enter your name here