Kampus Universidade Boaventura de Timor-Leste (UBTL). Imajen Tatoli/Nelia Fernandes

MANUFAHI, 30 outubru 2019 (TATOLI)—Xefe Departamentu Informátika Universidade Boaventura de Timor-Leste (UBTL) Manufahi, Alcino de Jesus Isaac,  hateten tinan oin Governu liuhusi Ministériu Edukasaun sei akredita UBTL.

Nia haktuir, foin lalais liubá, ekipa hosi Ministériu Edukasaun evalua ona katak universidade refere tama iha kategoria atu hetan akreditasaun iha tinan oin (2020).

Kampus Universidade Boaventura de Timor-Leste (UBTL). Imajen Tatoli/Nelia Fernandes

“Tékniku hosi Ministériu Edukasaun foin daudaun mai haree ona. Iha tinan 2020 nia laran ne’e UBTL bele hetan ona akreditasaun,” Alcino ba Agência Tatoli iha kampus UBTL, Luak, Suku Daisua, Postu Administrativu Same, Munisípiu Manufahi, kuarta (30/10).

Nia informa, UBTL harii hosi veteranu sira iha tinan 2017 liubá ho objetivu atu fasilita komunidade ne’ebé laiha kbiit atu lori oan sira ba eskola iha fatin dook hanesan iha Dili.

“Oinsá atu hamenus orsamentu ida-ne’ebé mak tun ba iha Dili, entaun sira (veteranu) loke eskola iha ne’e para fasilita povu kbiit laek sira,” tenik Alcino.

UBTL iha fakuldade sira mak hanesan Fakuldade Saúde iha departamentu rua hanesan Enfermajen no Saúde Públika, Fakuldade Agrikultura iha Departamentu Agronomia, Fakuldade Tékniku mak iha Departamentu Enjeñaria Sivíl no mós Enjeñaria Informátika no Fakuldade Ekonomia mak iha Departamentu Jestaun.

Alcino akresenta katak UBTL iha estudante hamutuk 197 no dosente sira ne’ebé hanorin iha universidade refere hamutuk 31, iha ne’ebé ho grau akadémiku lisensiadu no doutoradu.

Estudante sira iha universidade ne’e la’ós hosi Manufahi de’it maibé mai hosi munisípiu seluk hanesan Liquiçá, Manatuto, Baucau no Viqueque.

“Ami iha dormitóriu hamutuk 20 ba estudante sira. Estudante sira ne’ebé hela iha dormitóriu ne’e fulan ida  selu $35,” Xefe Departamentu ne’e esplika.

Alcino haklaken, sala aprendizajen iha UBTL hamutuk 5,  iha mós  laboratóriu, sala informátika, biblióteka no sala administrasaun. Kada semestre selu $75.

Hetan Apoiu

Antes ne’e, Alcino dehan, Universidade Boaventura de Timor-Leste (UBTL) hetan apoiu hosi Veteranu Austrália no Nova Zelándia hodi harii ona Sentru Formasaun Lian Inglés no fasilidade ba Departamentu Enfermajen. Aleinde ne’e, hetan apoiu mobiliáriu hosi Rotary Club Austrália no mós hetan apoiu komputadór hamutuk 20 no printer 6 hosi Kompañia ConocoPhilips.

Heta mós apoiu fasilidade desportu hosi Prezidente Parlamentu Nasionál, Arão Noé de Jesus da Costa Amaral no Kompañia Tinolina.

Alcino esklarese, difikuldade ne’ebé UBTL enfrenta mak falta bee-moos iha tempu bailoron. Tan ne’e, estudante no dosente sira ne’ebé hela iha dormitóriu obrigatoriamente ba kuru bee iha mota ne’ebé dook hosi universidade.

UBTL harii hosi veteranu sira hanesan Vidal de Jesus ‘Riak Leman’, Augosto de Araújo ‘Tara’, Gil da Costa ‘Oan Soru’, Domingos Augosto ‘Deker’ no Nicson.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here