Prezidente CET no Bispu Dioseze Maliana, Dom Norberto do Amaral (klaran), akompaña husi Arsebispu ba Arquidioseze Metropolitana Dili, Virgílio do Carmo da Silva (daruak karuk) no Bispu Dioseze Baucau, Dom Basílio do Nascimento, diriji Misa Selebrasaun Jubileu estraordináriu no Misa Komemorasaun tinan 30 (12 outubru 1989) São Paulo II visita Timor-Leste, iha Tasi Tolu, kuarta (30/10). Imajen Tatoli/António Gonçalves.

DILI, 30 outubru 2019 (TATOLI) – Iha  Misa Jubileu Estraordináriu ba Misaun no tinan 30 vizita João Paulo II iha Tasi Tolu, Sekretáriu Ezekutivu Conferência Episcopal Timorense (CET), Padre Leandro Maria Alves, halo anúnsiu ofisiál kona-ba regra ekleziál foun ne’ebé aprovadu ona no sei implementa iha Igreja lokál Timor-Leste.

Iha misa kuarta ne’e, Padre Leandro pronúnsia katak, konkluzaun ba regra foun ne’e hetan iha semana liturjia nasionál ne’ebé hala’o iha loron 18 to’o 22 jullu 2016 no enkontru Amu Bispu sira nian iha loron 8 fevereiru 2019.

Nia dehan, CET deside Ai-funan ba altár maka aifunan naturál de’it no matéria ba misa kompostu husi óstia ne’ebé mai husi trigu, tua ba misa mai husi uvas ne’ebé hetan lisensa husi autoridade ekleziástika nasionál no internasionál ruma.

Pontu ida tan maka, ba mate isin labele hakoi iha uma sorin maibé tenke hakoi iha semitériu no misa ba mate isin labele halo iha uma maski Madre no Padre sira nia inan-aman ka mate hafoin oras 24 nia laran.

“Tenke hakoi, bainhira hakarak misa korpu prezente, mate isin ne’ebé lori husi raí liur iha oras 48 nia laran tenke hakoi ona no misa korpu prezente halo de’it ba sira ne’ebé iha komuñaun ho Uma Kreda”, nia tenik.

Pontu ikus liu husi regra foun ne’e maka, labele simu komuñaun iha liman no ba sira ne’ebé bele fó komuñaun maka ministru ordenadu sira hanesan diákonu, padre no bispu sira, ministru instituídu hanesan akólitu no leitor sira, relijiozu no relijioza sira, votu perpétua, no ministru estraordináriu sira.

Padre Leandro deklara katak, hahú loron 30 outubru tinan ne’e, ofisialmente vigora ona testu ordináriu misa foun iha Igreja Katólika Timor-Leste tomak, ad exprimentum.

Nune’e mós, komunikadu ofisiál husi CET fó sai ba Nai Lulik sira, Pároku, Relijiozu no Relijioza sira, no komunidade sarani Katólika Timor-Leste nian atu hatene no halo tuir.

Ikus liu, Padre Leandro mos harohan ba São João Paulo II, atu harohan da’et ba sarani no Kreda Timor-Leste tomak.

Solusaun ba dokumentu hirak ne’e aprova iha Dili, 30 outubru 2019, Arsebispu ba Arquidiocese Metropolitana Dili, Virgílio do Carmo da Silva, Prezidente CET no Bispu Dioseze Maliana, Dom Norberto do Amaral, no Bispu Dioseze Baucau, Dom Basílio do Nascimento.

Jornalista : Cipriano Colo

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here