Ministru Negósiu Estranjeiru no Kooperasaun (MNEK), Dionísio Babo Soares

DILI, 30 outubru 2019 (TATOLI) – Ministériu Negósiu Estranjeiru no Kooperasaun (MNEK) aprezenta prioridade ministériu ba tinan 2020 no ezekusaun orsamentu tinan 2019 nian, liuhosi audiénsia konjunta komisaun iha plenáriu Parlamentu Nasionál (PN), kuarta ne’e.

Iha biban ne’e, Ministru Negósiu Estranjeiru no Kooperasaun, Dionísio Babo Soares, husu ba PN atu konsidera proposta montante orsamentu 2020 tamba tinan oin prevee de’it ba operasionál no sei laiha orsamentu atu loke embaixada foun iha rai liur.

“ASEAN kontinua prioridade, CPLP no multilaterál sira seluk, kapasitasaun ba diplomata sira no ba tinan oin sei rekruta diplomata foun to’o na’in-50 hanesan ne’e”, nia tenik durante audiénsia.

Governante ne’e dehan, razaun atu rekruta diplomata foun tanba diplomata tuan atu tama idade reforma ona.

“Ne’e ita tenke prepara (diplomata foun) ba tinan lima mai”, Dionísio Babo akresenta

Prezidente Komisaun B ne’ebé Trata Asuntu Defeza, Seguransa no Negósiu Estranjeiru, Adérito Hugo da Costa, louva ho servisu MNEK nian ne’ebé oras ne’e iha progresu ezekusaun orsamentu 2019 nian atinje ona kuaze pursentu másimu.

“Ha’u sente sira-nia ezekusaun sei másimu iha dezembru”, hateten Deputadu Bankada CNRT ne’e.

Iha orsamentu 2019, orsamentu ba MNEK $26.009.227, ho kompromisu $1.443.864,96, obrigasaun $1.330.062,85, atuál $19.543.257,14, saldo $3.692.042,05, nune’e ezekusaun atuál atunji ona pursentu 80,2.

Proposta orsamentu 2020 ba MNEK hamutuk millaun $28,224, kompostu husi saláriu no vensimentu millaun $14,584, bens no servisu millaun $12,440, transferénsia públika $600.000, no kapitál menór $600.000.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here