Prezidente Komisaun B, Adérito Hugo da Costa. Imajen Tatoli/Egas Cristovão

DILI, 30 outubru 2019 (TATOLI) – Prezidente Komisaun B (Trata Asuntu Defeza, Seguransa no Negósiu Estranjeiru), Adérito Hugo da Costa, apela ba entidade hotu iha territóriu tomak atu kontribui estabilidade iha selebrasaun finadu ne’ebé kada tinan sempre selebra iha loron 2 novembru.

“Husu nafatin atu entidade hotu kontribui pás no estabilidade, nune’e ema hotu halo movimentu ho livre hodi selebra loron finadu ba tinan ida-ne’e ho hakmatek”, tenik Adérito Hugo ba jornalista sira iha resintu Parlamentu Nasionál (PN), kuarta ne’e.

Deputadu Bankada CNRT ne’e, husu joven sira atu hadomi malu no respeita ema seluk ne’ebé halo hela movimentu, atu ema hotu bele selebra loron matebian ho di’ak tanba ema ida-idak sei fila ba knua.

Nune’e mós, nia fó hanoin ba kondutór sira atu pasa revista kondisaun karreta hafoin halo movimentasaun.

Adérito Hugo mós husu ba públiku ne’ebé uza motorizada, presiza haree didi’ak kondisaun, nune’e labele hasoru difikuldade iha dalan klaran.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here