Estatua Nossa Señora iha Foho Ariana, Postu Administrativu Venilale. Imajen/Foti hosi Google

BAUCAU, 30 outubru 2019 (TATOLI)-Postu Administrativu Venilale, Munisípiu Baucau, bele dehan, rai ida ne’ebé poténsia tebes iha area turizmu.

Administradór Postu Administrativu Venilale, Carlos Alberto Guterres. Imajen/ Osória Marques

Fatin lubuk, hanesan foho Ariana, Bee Manas Uai-cana, Ko’ak Hitu iha Bercoli, Lagoa Badumori, Bercoli no Asalaituta, hanesan sítiu turístiku ne’ebé merese atu esplora ho didi’ak hodi bele atrai turista sira no bele kontribui retornu ba Estadu.

Administradór Postu Administrativu Venilale Munisípiu Baucau, Carlos Alberto Guterres, informa, obra nesesáriu ne’ebé presiza tau atensaun mak hadi’a kondisaun estrada ba fatin distinsaun turístiku hirak ne’e. nune’e bele fasilita transporta turista sira halo vizita ba fatin sira ne’e.

Alein ne’e, Carlos Alberto Guterres, hatutan, kria kondisaun infraestrutura bázika    iha fatin sira ne’e hodi bele fó espasu di’ak ba vizitante sira.

Iha Venilale mós iha nia turizmu kultura lubun ho atividade kulturál nian ne’ebé bele mós atrai turista sira. inklui mós situ istóriku iha Uai-oli, fatin ne’ebé Komandante ein-Xefe FALINTIL halo kontaktu dame.

“Espera Governu bele tau osan hodi konstrui fatin turístiku hirak ne’e iha futuru,” hateten Carlos Alberto Guterres, bainhira dada lia ho Ajénsia TATOLI iha Venilale, foin lalais ne’e.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here