Sarani sira partisipa iha Misa Jubileu Estraordináriu no Misa Komemorasaun tinan 30 São Paulo II visita Timor-Leste (12 outubru 1989), iha Tasi Tolu, kuarta (30/10). Imajen Tatoli/António Gonçalves

DILI, 30 outubru 2019 (TATOLI) – Prezidente Repúblika (PR), Francisco Guterres ‘Lú Olo’ hateten, Timor-Leste presiza atu haburas nafatin valór Kristaun hodi la bele fó fatin ba injustisa iha tempu ukun-aan.

Xefe Estadu hato’o kestaun ne’e, liuhosi diskursu iha Misa Jubileu Estraordináriu ba  Misaun no tinan 30 vizita São João Paulo II iha Tasi Tolu.

“Ita restaura independénsia 17 ona maibé sei presiza hametin nafatin valór kristaun hanesan solidariedade no franternidade, atu ita bele harii metin ita-nia sentidu justisa atu labele fó dalan ba maioria ki’ak nafatin. Ida-ne’e injustisa no ita lakon sentidu fraternu no solidáriu”, tenik PR Lú Olo, kuarta ne’e.

Tuir nia, sentidu solidariedade no fraternidade nian kle’an tebetebes, tanba ne’e la bele esplika detallu.

“Ha’u labele ko’alia hotu ohin. Karik bele ko’alia liu de’it, ha’u define nu’udar prinsípiu no valór rasik husi natureza umana atu hametin sosiedade ida nia koezaun no identidade rasik liuhusi ninia konvivénsia no prátika reiterada. Ita timoroan hako’ak prinsípiu no valór sira ne’e iha kontestu evolusaun iha ita-nia sosiedade ida ne’ebé hakarak sai modernu no husi sorin seluk ho nia valór kulturál ne’ebé sei aas nafatin. No fundu, laiha negasaun ida ba seluk maibé sira moris hamutuk, fó kbiit ba malu no sira kompleta malu no halo ita timoroan sai ida de’it iha ita-nia rai rasik!”, PR subliña.

Nia dehan tan, prinsípiu no valór sira sai nu’udar referénsia boot ba komunidade internasionál hodi hametin sosiedade demokrátika no respeitu ba liberdade fundamentál ema moris nian no hatuur iha direitu naturál ne’ebé konsidera  ema   nu’udar   Na’i Maromak nia obra  loloos.

“Direitu naturál ida ne’e la’ós limite ba ema nia direitu maibé sai sasukat ba ema hotu-hotu nia direitu no liberdade. Tanba ne’e maka sosiedade ida polítikamente organizada la tolera, labele tolera violasaun ba direitus sira ne’e. Liberdade sai mós aspetu korrelativu ba direitu fundamentál.

Sarani sira partisipa iha misa selebrasaun Jubileu extraordinariu no misa ba komemorasaun tinan 30 Sao Paulo II visita Timor Leste. Misa Selebrasaun Jubeleu nee halao iha Tasitolu 30 Otubru 2019.Imajen/TATOLI

Xefe Estadu hatutan: “Tanba ne’e, mak negasaun ba ema ninia direitu hanesan mós nega ema-nia liberdade! Karik nune’ e, sosiedade ne’e la’ós demokrátika! Maibé  husi sorin seluk mós ita bele entende katak direitu naturál la’ós atu lori sosiedade ida moris naranaran,halo naranaran, ko’alia naranaran. Ida ne’e lahalo parte ba sosiedade ida ne’ ebé polítika, sivilizada no dezenvolvida”.

Nia salienta, katak direitu naturál la’ós direitu pur natureza tanba konsidera ema moris husi aspetu fíziku no materiál maibé la’ós psikolójiku no krítiku, ne’ebé konsidera ema nu’udar  ‘‘ser’’ no atu lori ema ba ’’dever ser’’ nu’udar fundamentu ba sosiedade ida solidária no fraternál.

“Ita tenke hametin-an nafatin nu’udar família boot ida ne’ebé hatuur-aan ho domin no pás, liuhusi kultura diálogu, espíritu koletivu, katak halo hamutuk, hodi ita  bele hasoru dezafiu oioin iha prosesu dezenvolvimentu atu haburas Timor-Leste hodi hasa’e moris di’ak ba povu tomak.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here