Pasajeiru sira hadau malu bis iha Terminal Becora atu hala'o sira nia viajen ba munisípiu Baucau. Imajen/Nelson de Sousa

DILI, 30 outubru 2019 (TATOLI)-Hela loron de’it ona atu Timor-oan sira iha Timor laran tomak selebra loron matebian (Finadu) ne’ebé tinan-tinan halo iha loron 02 novembru. Nune’e, sai ona hanesan kostume ida, falta loron rua atu selebrasaun loron refere komunidade lubun ne’ebé hela iha sidade  Dili sempre halo movimentu ba foho ka munisípiu.

Tuir observasaun Ajénsia TATOLI nian iha Terminal Becora, Dili, ohin, hatudu katak, ema ua’in tebes, hahú hosi labarik, joven, ferik no katuas sira nadodon hadau malu transporte públiku, hanesan bis ba dirasaun Manatuto, Baucau, Lautem ho Viqueque.

Se loron bai-leet, bis sira para nadodon hodi hadau malu pasajeiru, maibé dezde kedas horiseik, ohin no to’o aban, bis sira sei la hadau malu ona pasajeiru, maibé pasajeiru sira mak hobur no hadau malu bis atu bele hala’o viajen ba sira nia knua.

“Loron boot hanesan ne’e, ami la kolen ona buka pasajeiru, maibé pasajeiru mak halai hadau malu bis. Ida ne’e hanesan ona tradisaun tinan-tinan iha loron boot hanesan finadu, natal ho tinan foun,” hateten Alexandre da Costa, nu’udar sofer bis ida ho dirasaun Dili-Baucau baihira dada lia ho Ajénsia TATOLI.

Hosi sorin seluk, Cecilia do Rêgo, nu’udar pasajeiru fó sasin katak, loron matebian ne’e importante tebes tanba hanesan ona tradisaun ne’ebé Timor-oan sira hahi’i dezde bei’ala sira nia tempu.

“Bele dook ka serbisu barak, mas tempu finadu tenke fila ba knu’a atu bele selebra finadu hamutuk ho família. Lori ai-funan ho lilin ba vizita família matebian sira hodi hatudu ita nia domin ba ita nia família matebian sira iha sira nia loron,” hateten Cecilia do Rêgo.

Antes ne’e, autoridade Polisia Nasional Timor-Leste (PNTL) ho Diresaun Nasional Transporte Terrestre (DNTT) halo ona alerta ba transporte públiku sira, inklui komunidade ne’ebé halo viajen ba munisípiu atu la’o ho kuidadu nune’e to’o iha fatin destinasaun ho seguru.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here