Ministru Obra Públika Salvador Soares dos Reis Pires. Imajen/Tatoli.

DILI, 30 outubru 2019 (TATOLI) – Ministru Obra Públika (MOP), Salvador Eugénio Soares dos Reis Pires, apela ba komunidade ne’ebé halo viajen bá munisípiu sira hodi komemora loron matebian nian atu halai ho kuidadu tanba prosesu konstrusaun estrada nasionál sira iha área balun sei la’o hela.

“Apela ba kondutór transporte sira atu ba munisípiu karik halai ho kuidadu, tanba iha área balun kompañia sei halo serbisu. Iha fatin balun ne’ebé estrada kabeer ona tenke halai nafatin ho kalma tanba ita-nia vida importante liu”, hateten MOP liuhosi nota imprensa ne’ebé Tatoli asesu hosi Gabinete MOP, ohin.

Governante ne’e hatutan, daudaun ne’e kompañia sira halo konstrusaun ba estrada nasionál sira husi kapitál Dili bá munisípiu Manatutu, Baukau no Lautein, husi Dili bá Maliana, inklui estrada nasionál ba munisípiu sira seluk.

Iha 23 setembru ne’e, ekipa supervizaun temporária nomea husi MOP halo kontrolu ba prosesu konstrusaun iha fulan refere nota katak prosesu konstrusaun ne’e atinje ona porsentu 72. Tanba ne’e husu halo movimentu bá munisípiu, ou husi munisípiu mai kapitál Dili atu halai ho kuidadu.

No mós hato’o ba públiku tomak katak konstrusaun estrada Dili (Hera)–Manatutu seidauk to’o iha faze servisu ou instalasaun fasilidade estrada nian (Traffic sign, Road marking Guard rail no Reflective glass) maka husu atensaun ba públiku atu kondús motorizada no karreta ho kuidadu.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here