Prezidente Repúblika, Francisco Guterres ‘Lu Olo’, akompaña husi ninia kaben, Cidália Lopes Nobre Mouzinho Guterres, partisipa iha Misa Jubileu Estraordinária no Misa Komemorasaun tinan 30 São Paulo II visita Timor-Leste (12 outubru 1989), iha Tasi Tolu, kuarta (30/10). Imajen Tatoli/António Gonçalves

DILI, 30 outubru 2019 (TATOLI) – Prezidente Repúblika (PR), Francisco Guterres ‘Lú Olo,  agradese ba joven sira ne’ebé ho aten barani halo manifestasaun iha Tasi Tolu, iha tinan 30 liubá hodi loke povu nia terus ba mundu. 

“Ho naran Estadu Timor-Leste nian, ha’u agradese ba joven sira ne’ebé habrani-aan iha tinan tolu nulu liubá, iha fatin istóriku ida ne’e no lapara habrani-aan to’o ita restaura ita-nia independénsia iha 20 maiu 2002”, tenik PR Lú Olo iha Misa Agradesimentu tinan 30 Vizita São João Paulo II, iha Tasi Tolu, kuarta ne’e.

Sarani sira partisipa iha misa selebrasaun Jubileu extraordinariu no misa ba komemorasaun tinan 30 Sao Paulo II visita Timor Leste. Misa Selebrasaun Jubeleu nee halao iha Tasitolu 30 Otubru 2019.Imajen/TATOLI

Xefe Estadu konsidera, tinan 30 liubá prezensa Santu Padre João Paulo II mai Timor-Leste nu’udar misionáriu ida atu habelar solidariedade no fraternidade.

Nia dehan, Papa nia misaun mai Timor-Leste hodi haree no  rona rasik povu nia halerik no hakarak, no iha tempu ne’ebá maioria Povu hili tiha ona Relijiaun Katólika.

“Misaun ne’e hanesan faze foun ida, hahú ba ita-nia luta ba independénsia iha tempu ne’ebá, tanba ne’e susar tebes atu hato’o ita-nia halerik no hakarak ba komunidade internasionál tanba iha oportunidade ne’e Joven lubuk-oan ida ho barani halo menifestasaun hodi manifesta povu ida ne’e nia terus”, Lú Olo akresenta.

Sarani sira partisipa iha misa selebrasaun Jubileu extraordinariu no misa ba komemorasaun tinan 30 Sao Paulo II visita Timor Leste. Misa Selebrasaun Jubeleu nee halao iha Tasitolu 30 Otubru 2019.Imajen/TATOLI

Nia mós nota katak, tanba sente haksolok ho Igreja Katólika nia mahon husi horiuluk kedas, joven sira habrani-aan no organiza manifestasaun públika hasoru okupasaun Indonézia ba dahuluk iha loron 12 outubru 1989,  hafoin misa iha Tasi Tolu, maski hatene katak Militár Indonésia tau forsa boot ida  iha ne’ebá.

“Manifestasaun públika, iha situasaun ida manas tebetebes hanesan ne’e, hatudu barani no determinasaun husi ita-nia joven sira”, Lu Olo subliña.

Xefe Estadu konta tan, joven sira barani halo manifestasaun tanba sira mos hatene katak Papa nia vizita dada mos jornalista husi rai oioin mai  Dili, ne’ebé sira-nia filme ikus mai hatudu  violénsia  husi tropa Indonézia no dada fali atensaun husi komunidade internasionál ba Povu Timor-Leste nia lian-halerik no hakarak.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here