Xapa matríkula. Imajen espesiál


DILI, 30 outubru 2019 (TATOLI) – Kontratu entre Ministériu Transporte no Komunikasaun (MTK) ho empreza Caicobilari ba produsaun xapa matríkula sei finaliza iha 31 outubru, maibé empreza husu ba ministériu atu prolonga ba 15 novembru tanba difikuldade iha alumíniu.

“Ami seidauk finaliza produsaun ba xapa matríkula tuir data ne’ebé ami determina iha 31 outubru, maibé ami-nia karta husu tan prolongamentu to’o 15 novembru, tanba difikuldade ba aluminium, tanba aluminium iha ne’e ladún iha kualidade ne’ebé garantidu, nune’e ami enkomenda (pesan) fali husi Indonézia”, klarifika Diretora Empreza Caicobilari Supply Unip, Lda, Genoveva Fátima Araújo Amaral, ba Ajénsia Tatoli via-telefónika, ohin.

Nia akresenta katak razaun kompañia hato’o karta ba MTK sobre difikuldade alumíniu no oinsá ministériu bele hatene serbisu empreza nian ba prosesu produsaun xapa matríkula durante ne’e la’o no to’o ona iha ne’ebé, tanba iha 15 novembru sei finaliza produsaun xapa matríkula ho rihun 22 iha Indonézia, maske kontratu sei valida iha 31 dezembru.

Iha sorin seluk, Diretór Administrasaun Finansa hosi MTK, Deonísio de Araújo, hatán katak nia parte simu ona karta prolongamentu no fó permisaun ba empreza atu serbisu tuir kontratu, se tarde maka ministériu sei fó sansaun.

“Karik tarde iha prosesu maka husi ministériu sei fó sansaun katak bele hakotu kontratu ho kompañia tuir lei aprovizionamentu nian haruka”, salienta.

Notísia relevante : DNTT Husu Empreza Caicobilari Aselera Produsaun Xapa Matríkula

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here