Prezidente Repúblika, Francisco Guterres 'Lú Olo'. Imajen TATOLI/Eugénio Pereira

DILI, 30 outubru 2019 (TATOLI) – Prezidente Repúblika (PR), Francisco Guterres ‘Lú Olo’, hateten, Xefe Estadu deklara ona Eleisaun Antesipada ne’ebé povu Timor-Leste realiza ona iha tinan 2018 no povu deside fó votu maioria ba koligasaun partidária Aliansa Mudansa ba Progresu  (AMP), ne’ebé kompostu husi partidu CNRT, PLP no KHUNTO.

Iha loron 1 fevereiru 2018, molok tama Eleisaun Antesipada, líder másimu partidu tolu asina memorandu entendimentu atu sai pakote úniku hasoru Eleisaun Aantesipada.

Notísia Relevante: AMP Avansa Ho Pakote Úniku

Nune’e, loron 26 janeiru 2018, PR Lú Olo deside disolve Parlamentu Nasionál (PN) tanba konsidera mosu ona krize institusionál iha Uma Fukun no husu atu povu vota fila fali iha Eleisaun Antesipada atu bele rezolve dezafíu foun ne’ebé nasaun no povu enfrenta momentu ne’ebá.

Notísia Relevante: PR Deside Disolve PN

“Primeiru, Eleisaun Antesipada ha’u deklara no ita halo tiha ona iha tinan 2018, Ha’u respeita tebetebes povu ninia votu ne’ebé fó ba AMP”, tenik Xefe Estadu ba jornalista sira, hafoin partisipa iha Misa Jubileu Estraordináriu ba Misaun no Tinan 30 vizita Papa João Paulo II iha Tasi Tolu, kuarta ne’e.

PR hatutan: “Segundu, hakarak hateten katak,  Prezidente Repúblika rasik mak fó pose ba VIII Governu Konstitusionál, nune’e Xefe Estadu mós respeita Governu ida ne’e. Terseiru, Governu ida ne’e sei iha ninia polítika ida-ne’ebé agora daudaun lori hela ninia Osamentu  Jeral Estadu (OJE) tinan 2020 atu ba diskute iha Parlamentu Nasional hodi haruka ba Prezidente Repúblika atu promulga”.

Xefe Estadu ko’alia asuntu ne’e, relasiona ho deklarasaun Primeiru-Ministru, Taur Matan Ruak, katak bainhira laiha dalan atu rezolve membru Governu pendente, karik bele hakat ba Eleisaun Antesipada.

Notísia RelevanteLaiha Dalan ba Membru Governu Pendente, Bele ba Eleisaun Antesipada

Tanba ne’e, Xefe Estadu la konkorda iha Eleisaun Antesipada ho buat hirak ne’e hotu tanba Nia rasik deklara ona iha tinan 2018.

Nia rekoñese, karik razaun lista membru governu pendente ne’ebé seidauk hetan pose maka sei sai impedimentu, maibé nia dehan ida ne’e kompeténsia AMP nu’udar koligasaun ne’ebé forma VIII Governu Konstitusionál.

“Hau la bele ko’alia kona-ba asuntu ne’e tanba nu’udar CNRT, PLP no KHUNTO nia problema. Atu troka ka la troka ne’e desizaun AMP nian”, PR subliña.

Entretantu, partidu tolu ne’ebé kompostu husi CNRT, PLP no KHUNTO, asina Plataforma Polítika Bankada Partidu Polítiku Parlamentu Nasionál iha loron 12 outubru 2017 ho naran Aliansa Maioria Parlamentár (AMP).

Plataforma koligasaun ne’e akontese fulan haat hafoin Eleisaun Parlamentár iha loron 22 jullu 2017 no membru deputadu foun lejizlatura dahaat simu pose iha loron 5 setembru 2017.

Entretantu, membru governu  indijitadu ne’ebé Xefe Estadu seidauk fó pose mak hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór, António Verdial (deklara rezigna-aan ona), Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Enkuantu, ba kandidatu ba kargu Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, PR Lú Olo aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here