Prezidente CET no Bispu Dioseze Maliana, Dom Norberto do Amaral (klaran), akompaña husi Arsebispu ba Arquidioseze Metropolitana Dili, Virgílio do Carmo da Silva (daruak karuk) no Bispu Dioseze Baucau, Dom Basílio do Nascimento, diriji Misa Selebrasaun Jubileu estraordináriu no Misa Komemorasaun tinan 30 (12 outubru 1989) São Paulo II visita Timor-Leste, iha Tasi Tolu, kuarta (30/10). Imajen Tatoli/António Gonçalves.

DILI, 30 outubru 2019 (TATOLI) Conferência Epíscopal Timorense (CET) fó ona solusaun balun atu rezolve problema dokumentu identidade ne’ebé liga ho parte igreja.

Iha ámbitu Misa Jubileu Estraordináriu ba Misaun no tinan 30 vizita Papa João Paulo II iha Tasi Tolu, kuarta ne’e, Sekretáriu ezekutivu CET, Padre Leandro Maria Alves, fó sai anúnsiu ofisiál ne’ebé hateten desizaun ne’ebé CET fó sai liuhosi enkontru ho entidade kompetente sira hodi koordena servisu parókia, nune’e bele fó solusaun.

Konferénsia dahuluk hala’o ona iha loron 9 outubru, iha salaun Katedrál Dili, entre Amu Bispu Dioseze Dili, Maliana no Baucau, Pároku no Vigáriu Parokiál sira.

Nia dehan, husi enkontru ne’ebé akontese dala tolu, CET hola desizaun katak bainhira atu halo verifikasaun haloos dokumentu ne’ebé sala no hakerek ona iha livru maka iha asentu, maibé tanba dadus ruma la loos, sei halo tuir de’it livru ne’ebé iha asentu.

“Bainhira liu tinan hirak maka atu muda karik tenke husu lisensa husi Amu Bispu ka Ordinário de Lugar”, tenik.

Padre Leandro esplika, kona-ba restaurasaun dokumentu, bainhira livru parókia nian lakon ka aat tenke hasai justifikasaun kredível sira hanesan sertidaun tuan, sélula, visa, ho lisensa husi Amu Bispu ka Ordinário do Lugar.

Kona-ba transkrisaun, nia dehan bainhira pesoál ne’ebé sarani ka kaben iha raí li’ur maibé hakarak rejistu iha livru parokiál Timor-Leste, tenke husu lisensa husi parókia ne’ebé nia kaben ka sarani bá.

Nune’e mós, nia temi retifikasaun halo de’it bainhira inan-aman sira fó dadus kompletu no loloos iha tempu sarani oan sira.

Liután ida-ne’e, Padre refere oituan kona-ba bainhira atu haloos identidade tuir dokumentu sivíl posteriór diploma, sertidaun Repúblika Demokrátika Timor-Leste (RDTL), Kartaun Eleitorál, Billete Identidade no sertifikadu.

“Ba sira ne’ebé rejistu naran iha sivíl molok sarani, tenke lori dokumentu sivíl ba kartóriu no hakerek iha livru asentu batizmu tuir dokumentu sivíl”, nia informa.

Padre hatutan, naran ne’ebé ligadu ho identidade ida labele muda tuir tempu portugés, indonéziu no tempu ukun-aan.

“Bainhira ema ida sarani maibé inan-aman sei jentiu hela, iha tinan ruma maka inan-aman foin sarani, nia oan sira de’it maka bele uza avó sira nia naran sarani”, subliña.

Iha pontu seluk ne’ebé dehan katak, atu halo restaurasaun ba dokumentu, presiza lisensa husi Amu Bispu ka Ordinário do Lugar no presiza mós justifikasaun orál no kredível liga ho dokumentu antigu, sertidaun tuan, visa ho lisensa husi entidade kompetente sira.

Nia informa iha loron 16 outubru, Prezidente CET, Dom Norberto di Amaral, hamutuk ho Amu Bispu Dioseze Dili, Maliana no Baucau, hasoru malu ho Embaixadór Portugal iha Timor-Leste, José Pedro Machado Viera, hafoin halo konferénsia datoluk ne’ebé realiza iha loron 17 outubru, hodi rezolve problema dokumentu identidade, liuliu bainhira atu trata dokumentu identidade iha Embaixada Portugal.

“Nota ba hirak ne’ebé iha de’it sertidaun restaurada, susar atu hetan nasionalidade portugués”, Padre Leandro rekoñese.

Nune’e mós, kona-ba atu hasai imajen husi livru no iha asentu ruma, presiza aprezenta ofísiu husi embaixada no hetan autorizasaun husi Ordinário do Lugar, inklui ninia auténtisidade pároku de’it maka bele hasai imajen, imprime, rekoñese, no tau karimbu.

“Tuir lei Kanónika, sertidaun sira ninia validade ba fulan neen de’it, tanba ne’e Amu Bispu sira husu ba maluk sira hotu, pároku no sarani tomak Timor-Leste nian, atu halo tuir”, haktuir nota ofisiál husi CET.

Kona-ba transkrisaun, husi rezultadu konferénsia deside katak, tenke husu lisensa ba parókia ne’ebé kaben ka sarani ba.

Nia esplika mós, atu halo transkrisaun, tenke aprezenta karta lisensa (justifikasaun), sertidaun orijinál no kartaun eleitorál, ne’ebé atu halo transkrisaun tuir formuláriu vigora iha dioseze sira.

Solusaun ba dokumentu hirak ne’e aprova iha Dili, 30 outubru 2019, husi Arsebispu ba Arquidioseze Metropolitana Dili, Virgílio do Carmo da Silva, Prezidente CET no Bispu Dioseze Maliana, Dom Norberto do Amaral, no Bispu Dioseze Baucau, Dom Basílio do Nascimento.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here