Presidente Konsellu Administrasaun BNCTL, Brígido de Sousa.

DILI, 30 outubru 2019 (TATOLI) – Prezidente Konsellu Administrasaun Banku Nasionál Komérsiu Timor-Leste (BNCTL, sigla portugés), Brígido de Sousa, hatete banku komprometidu tebes atu dijitaliza nia-aan katak sistema hothotu tenke moderniza.

“Ami komprometidu tebes atu dijitaliza, tanba kontinua manuál sei lakon tanba banku komersiál sira dijitaliza ona sira nia-aan, ne’ebé hakarak ka lakohi BNCTL tenke la’o ona no la’o liu bá oin. Entaun, agora daudauk ami hahú ona faze dahuluk ho ATM, Pos”, hateten Prezidente Konsellu Administrasaun ne’e ba Tatoli iha parlamentu nasionál, kuarta ne’e.

Tuir Brígido de Sousa katak, daudauk BNCTL estabelese ona mákina ATM hamutuk 30 iha territóriu tomak no Pos hamutuk 50. Pos tau iha loja sira no iha munisípiu balu ne’e fasilita ema kompra.

“Dala ruma mákina aat tanba Telemor nia liña fraka, ne’ebé agora esforsu hela atu servisu hamutuk fali ho Timor Telecom ou Telekomcel para iha liña back up bainhira liña Telemor fraka, ida seluk bele ajuda”, afirma Brígido.

Autoridade másima BNCTL ne’e katak ATM ne’e buat ida ne’ebé uza tinan 30 liubá. “Ne’ebé tinan oin ami sei prodús internet banking, mobile banking no agora ami halo hela esforsu maka’as para servisu ho provider na’in-rua para permite BNCTL hasai kartaun hanesan master card no mós union pay hosi Xina ne’ebé maka nia merkadu boot liu iha mundu”, esklarese Brígido.

Notísia relevante : Governu Propoin Millaun $11 Hodi Kapitaliza BNCTL

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here