Governadór BSTL, Abraão de Vasconcelos. Imajen/Tatoli Egas Cristovao.

DILI, 30 outubru 2019 (TATOLI) – Governadór Banku Sentrál Timor-Leste (BSTL), Abraão de Vasconcelos, informa banku komersiál rua hanesan Banku Repúblika Indonézia (BRI) no Mandiri espresa sira-nia interese hodi partisipa tan iha eskema garantia kréditu.

“Agora, banku komersiál sira espresa sira-nia interese hakarak partisipa hanesan BNCTL, BRI no Banku Mandiri, no prosesu revizaun ba sira-nia polítika no prosedimentu sobre kréditu kompleta ona, hela Banku Mandiri maka prosesu sei dezenvolve hela, maibé banku rua seluk kompleta ona”, hateten Governador BSTL ne’e iha Parlamentu Nasionál, ohin.

Antes ne’e, Banku Nasionál Komérsiu Timor-Leste (BNCTL, sigla portugés) mak nu’udar banku dahuluk ne’ebé partisipa hodi sai hanesan kredór, hafoin Banku Mandiri no BRI ne’ebé sei partisipa mós.

Governador ne’e hatutan, maske banku rua (BNCTL ho BRI) kompleta ona, maibé BSTL seidauk hala’o fali diskusaun ho banku rua refere.

“Sistema ne’e preparadu ona, ne’ebé banku sira automatikamente bele joint. BNU iha inísiu sira espresa interese hakarak joint, maibé sira halo review ida, sira deside atu la partisipa, tanba programa eskema garantia kréditu ne’e la’ós obrigatóriu, entaun banku sira bele deside atu la partisipa”, dehan Abraão de Vasconcelos.

Abraão dehan, to’o agora BSTL seidauk simu aplikasaun formál hosi BNCTL rasik, maske antes ne’e banku refere simu ona proposta hosi empreza balu hodi asesu ba sistema ne’e.

“Sira dehan iha ona empreza, maibé sira halo teste ba sistema más la haruka aplikasaun formál mai ami. Tanba kuandu haruka ona ba Banku Sentrál durasaun tempu ne’e loron haat ou lima, maibé ho sistema ne’ebé Banku Sentrál dezenvolve durasaun to’o loron lima ne’e la nesesáriu”, afirma Governadór.

Líder másimu BSTL ne’e esklarese, Banku Sentrál la halo aprovasaun kuandu laiha aplikasaun ida mai hosi banku. Banku Sentrál só aprova aplikasaun ba kréditu ida ne’ebé mak kobre hosi sistema garantia bainhira banku komersiál sira haruka ba BSTL.

Prezidente BNCTL, Brígido de Sousa, hatete BNCTL ho Banku Sentrál halo komunikasaun regularmente kona-ba implementasaun eskema garantia kréditu ne’e no iha kestaun téknika balu ne’ebé presiza atu rezolve.

“La’ós kestaun téknika ami-nia dezentendimentu, maibé sistema maka presiza halo oinsá haruka, ezemplu, ami simu proposta, análiza tiha tenke haruka ba Banku Sentrál ho online, entaun presiza sistema ida ne’ebé di’ak”, katak Prezidente ne’e.

Hodi haktuir sistema ne’ebé estabelese ona hosi Banku Sentrál seidauk funsiona porsentu 100, no agora, BNCTL ho BSTL halo hela koordenasaun para atu hadi’ak liután sistema ne’e permite BNSTL haruka aplikasaun online ba Banku Sentrál no sira iha loron lima halo avaliasaun no aprova hodi haruka fali mai BNCTL hodi fó kréditu ba empreza sira.

“Agora daudaun, ami simu empreza tolu no halo hela análiza, maibé atu haruka ba Banku Sentrál maka presiza haree di’ak liután kestaun téknika balu”, afirma.

Notísia relevante : Sistema Garantia Prontu Simu Pedidu ba Kréditu

MKAE Orgullu ho Kriasaun Eskema Garantia Kréditu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here