Embaixadór Austrália mai Timor-Leste Peter Robert, hala’o enkontru ho Ministru Defeza no Ministru Interior Interinu, Filomeno da Paixão de Jesus, iha Ministériu Defeza, Fatuhada, Dili. Imajen/MD

DILI, 30 outubru 2019 (TATOLI) -Embaixadór Austrália mai Timor-Leste, Peter Robert, konvida Ministru Defeza no Ministru Interior Interinu, Filomeno da Paixão de Jesus, hodi reprezenta Timor-Leste atu partisipa iha konferénsia   internasionál kona-ba kontra terrorizmu.

Konferénsia internasionál ne’e sei hala’o durante semana ida iha novembru,  ne’ebé lidera husi Governu Austrália liuhosi Ministériu Interna hodi konvida nasaun ki’ik sira ne’ebé hetan ameasa no presaun hosi atividade terrorizmu nian.

Durante iha Austrália, Ministru Filomeno Paixão, sei hala’o enkontru  ho Ministru Interiór Austrália hodi ko’alia  kona-ba asuntu serbisu polisiamentu komunitária, tráfiku, serbisu migrasaun nian no serbisu polisia ba dame nian.

Ba jornalista sira, ohin, hafoin hala’o enkontru ho Ministériu Defeza, Embaixadór Austrália Peter, informa, konferénsia ne’e importante tebes sei partisipa ministru sira hosi nasaun oin-oin hodi diskute polítika kontra terrorizmu ne’ebé nasaun hotu- hotu presiza serbisu hamutuk hodi kombate no limita atividade terrorizmu.

Iha fatin hanesan, Ministru Filomeno  Paixão, dehan, konferénsia ne’e importante no Timor-Leste nu’udar nasaun foun presiza buka esperiénsia hodi hametin liután lutu seguransa iha rai laran hamutuk ho nasaun hotu- hotu luta kontra terrorizmu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here