Diretora Serviço Municipal de Saúde Manufahi, Florencia Corte-Real Tilman. Imajen Tatoli/Nelia Fernades

MANUFAHI, 29 outubru 2019 (TATOLI)—Sentru Saúde Manufahi infrenta difikuldade ba profisionál saúde no transporte.

Diretora Sentru Saúde Manufahi, Florencia Corte-Real Tilman haktuir katak sira labele kobre ba to’o iha Postu Saúde iha área rurál tanba rekursu umanu (pesoál saúde) menus. Iha Manufahi, Postu Saúde hamutuk 10 hanesan Datina, Rotutu, Tutuluro, Bubulau, Simpang Tiga, Betano, Kafé Koreia, Grotu, Daisua Lama no Pemuda Tane.

Entre Postu Saúde 10 ne’e, nia haklaken, iha postu saúde tolu mak seidauk iha profisionál saúde (médiku, parteira no infermeiru) hanesan iha Grotu, Daisua Lama no Pemuda Tane.

Ho limitasaun ne’e, nia dehan, sira ba halo de’it Klínika Móvel—fulan ida ba dala ida ka dala rua, tanba, atu fahe tempu ne’e mak araska uitoan.

“Hanesan ita-nia pasiente sira kuandu hetan moras iha Postu Saúde, entaun sira telefone ami ba foti lori mai iha Sentru Saúde Manufahi hodi halo atendimentu ba sira,” hateten Florencia ba Agência TATOLI iha Bairrru Nuu-Laran, Postu Administrativu Same, Munisípiu Manufahi, tersa ne’e.

Nia esplika, oras ne’e, Sentru Saúde Manufahi iha médiku na’in 30 de’it, infermeiru iha 29 no parteira iha 26.

Tuir nia, Sentru Saúde Manufahi presiza tan rekursu umanu hanesan infermiru, parteira no médiku nune’e bele ajuda serbisu.

“Tanba, se lae, ema ida (profisionál saúde) kaer serbisu rua-tolu dala ida. Entaun, ami-nia atendimentu ezemplu ema bolu derrepente iha kalan, ami labele ba. Ema ida halo serbisu kalan nia labele husik hela ninia serbisu, entaun tenke bolu fali seluk. To’o ha’u hanesan diretora mós dalaruma tenke ba hein fali iha maternidade (fatin partu) para ida kolokadu iha maternidade ne’e bele ba atende fali pasiente sira ne’ebé bolu iha tempu kalan. Ida-ne’e mak ami hasouru,” Florencia informa.

Problema ne’e, Florencia dehan, nia hato’o ona ba Ministériu Saúde atu solusiona. “Ita hatene Ministériu Saúde iha planu atu loke rekrutamentu ba profisionál saúde hamutuk ema-na’in 300 fahe ba munisípiu sira hotu,” nia tenik.

Limitasaun Transporte

Iha biban ne’e, Diretora Sentru Saúde Manufahi mós relata katak iha Sentru Saúde Manufahi ambulánsia iha ida de’it no ambulánsia multi funsaun iha haat, maibé ambulánsia ne’e dezde 2009 to’o agora avaria hela de’it.

“Ami uza tiha depois aat beibeik. Ne’e duni, bele dehan ami infrenta difikuldade ba transporte. Só ambulánsia de’it mak nia tenke perkore buat hotu,” nia haktuir.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here