Sekretatiu Estadu Igualidade Jeneru no Inkluzaun (SEII) fasilita formasaun jestaun negosiu no kontabilidade ba benefisiariu Fundu Transferensia Publiku husi munisípiu 12 ho RAEOA. Imajen/Nelson de Sousa

DILI, 29 outubru 2019 (TATOLI)-Sekretária Estadu Igualdade no Inkluzaun (SEII), oferese formasaun iha area negósiu durante loron rua; hosi loron   28 to’o loron 29 outubru ne’e, ba benefisiáriu 60-resin  ne’ebé benefisia hosi fundu transferénsia públika.

Benefisiáriu hirak ne’e mai hosi munisípiu 12 inklui Rejiaun Administrativu Espesiál Oe-Cusse (RAEOA) ho esperansa katak, formasaun ne’e bele lori benefisiáriu sira jere fundu transferénsia públiku ho atividade negósiu produtivu atu kontribui ba povu nia interese.

Diretora  Nasionál Abordajen Integradu Jéneru Maria Filomena Babo Martins hateten, matéria ba formasaun ko’alia liu kona-ba jestaun negósiu no kontabilidade ne’ebé aprezenta hosi oradór prinsipál sira mai hosi Institutu Apoiu Dezenvolvimentu  Emprezariál (IADE), Banku Nasionál Komérsiu Timor-Leste (BNCTL-sigla portugés) ho Serbisu Reziste Verifikasaun Emprezariál (SERVE).

Filomena Fatima Amaral hanesan benefisiáriu hosi  grupu buka moris hosi Munisipiu Bobonaro,  kontente ho formasaun ne’e bele aumenta sira nia koñesimentu iha atividade negósiu.

Grupu buka moris nia atividade  prodús mina nuu virjen inklui halo kripik hudi fan iha merkadu ho nia membru feto na’in 20.

Nia mós agradese ba jestu  Governu nian  liuhosi SEII ne’ebé tulun ona sira liuhosi fundu transferénsia públika iha tinan 2019 ho valor orsamentu $1.800 hodi suporta sira nia atividade indústria ki’ik.

Sekretária Estadu Igualdade no Inkluzaun (SEII) iha tinan 2019 liuhosi fundu transferénsia Públiku prevee osan hamutuk $20,225.00 hodi apoiu família vulnerable no grupu ki’ik hamutuk 38.

Maioria benefisiáriu sira ne’e halo atividade loke kiós, loke  Alfaiate, kuda modo, homan tais, hakiak manu, fahi no seluk tan.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here