Artista Artezanatu, Francisco da Costa. Imajen Tatoli/Xisto Freitas

MANUFAHI, 28 outubru 2019 (TATOLI)—”Aifuan monu la dook hosi nia hún”.

Arte, kbiit ida atrai ema atu sente buat ruma. Arte hahoris hosi artista. Maibé, ema hotu labele sai artista. Atu sai artista, depende skill ne’ebé ema ne’e hetan liuhusi formasaun no fatór jenétiku.

Francisco da Costa (47), sai artista la liuhusi formasaun iha nível edukasaun maibé fatór jenétiku.  Aman hanesan artista ba artezanatu, forma Francisco sai artista tuir aman nia ain le’ut. Nia oras ne’e harii ona grupu arte ho naran Hadomi Kultura Timor (HKT), hodi prodús artezanatu oioin.

Artezanatu ne’ebé prodús hosi Francisco da Costa. Imajen Tatoli/Xisto Freitas

“Ha’u-nia aman artista ida. Uluk, nia prodús ona arte balun mak hanesan Kruz-Boot tau iha Igreja Manufahi no seluk-tan, nune’e ha’u hanesan kontinuador de’it ninia obra,” nia tenik ba Agência TATOLI, iha nia kna’ar fatin, segunda (28/10/ 2019).

Grupu ida-ne’e, HKT, Lokaliza iha Aldeia Kota Lala, Suku Letefoho, Postu-Administrativu Same-Vila, Munisípiu Manufahi. Nia habahat (ukir) ai-abut, ainahar, bambú, aiteka, ai bubur inklui mós karau kulit sai estátua.

Lori ninia kriatividade ne’e, sai hanesan bukae atu sustenta ninia família. Iha tempu misaun United Nations Transitional Administration in East Timor (UNTAET), produtu ida-ne’e folin tebes tanba malae sira mak gosta sosa. Maibé, ohin loron,  produtu refere la folin tanba laiha merkadu.

Artezanatu ne’ebé prodús hosi Francisco da Costa. Imajen Tatoli/Xisto Freitas

“Artezanatu ne’e iha valór boot tanba reprezenta identidade ida. Nia (artezanatu) sai turizmu hodi dada ema-nia atensaun,” Francisco esplika.

Nia haktuir, maski kompradór laiha, nia kontinua promove produtu refere liuhusi feira ruma iha munisípiu no nasionál, hodi bele promove identidade Manufahi ba Timor no mundu. “Ne’e la hamate ha’u-nia vontade atu kontinua prodús no promove artezanatu,” Francisco informa.

Nia dehan, prosesu prodús artezanatu ne’e lori tempu naruk uitoan. Bele to’o tinan ida. Hetok lori tempu naruk, presu mós boot. Folin bele atinje $1000,00 ba leten kada artezanatu. Maibé, ba timoroan, bele nego.

Artezanatu ne’ebé prodús hosi Francisco da Costa. Imajen Tatoli/Xisto Freitas

Atu hatutan obra ida-ne’e iha futuru, nia hahú kapasita Manufahi oan sira. Durante ne’e, nia serbisu mesak de’it. Kuandu iha difikuldade ruma, obra ne’e tenke paradu tanba laiha ema bele habahat artezanatu ne’e.

Nia husu ba parte relevante hanesan Sekretaria Estadu Arte no Kultura atu toma atensaun no kria kondisaun ba produtu artezanatu sira, nune’e munisípiu ida-idak bele hetan konfiansa hosi konsumidór sira liuliu turista sira hodi sosa.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here