Prezidente Konsellu Imprensa, Virgílio da Silva Guterres. Imajen/Egas Cristovão

DILI, 29 outubru 2019 (TATOLI) – Prezidente Konsellu Imprensa (CI-sigla Portugés), Virgílio da Silva Guterres, husu ba Governu atu hapara perdiem (osan viajen) ba jornalista bainhira hala’o kobertura iha atividade Governu nian, tantu iha munisípiu no Dili laran.

“Ha’u rekomenda ba Governu liuliu ministériu sira ne’ebé sei fó perdiem ba jornalista sira hodi halo kobertura ba sira ninia atividade, Konsellu Imprensa husu di’ak liu para, iha munisípiu ka ne’ebé de’it”, tenik Virgílio iha Salaun Tower, Fatuhada, tersa ne’e.

Nia konsidera, bainhira fó perdiem ba jornalista hodi halo kobertura hanesan mós halo infrasaun hasoru kódigu étika.

“Jornalista sira bainhira ba halo kobertura hanesan sira ninia serbisu loroloron ninian. Se nia la halo kobertura nia la’ós jornalista. Jornalista ne’e atu halo kobertura, rekolla dadus, verifika, klarifika no konfirma hafoin fó aprezentasaun. Entaun labele selu sira, tanba sira mós hetan ona saláriu hosi sira nia instituisaun mídia ne’ebé inklui mina, trasporte no pulsa hodi halo kobertura”, nia dehan.

Nune’e, eis jornalista ne’e husu ba instituisaun mídia hotu atu garante no fasilita di’ak ba profisionál órgaun komunikasaun sira.

“Mídia sira atu haruka nia jornalista ba kobertura iha munisípiu tenke garante fasilidade hanesan akomodasaun no transaporte ba nia jornalista. Mídia labele haruka sira nia jornalista ba sein iha fasilidade. Bainhira laiha fasilidade di’ak liu lalika haruka”, nia subiña.

Tuir Virgílio, bainhira instituisaun sira ‘selu’ jornalista hanesan mós sosa sasan iha loja.

“Sasan ne’e bainhira ha’u fó osan ona atu aat ka di’ak ha’u nian. Ho nune’e, hanesan mós notísia kuandu ha’u fó ona osan nia atu tun mós tenke ho di’ak tuir ha’u ida fó osan no nia labele krítika fali ha’u nia ministériu tanba ha’u fó osan ba jornalista ona. Tanba sa kontra fali ha’u, ida ne’e sente la di’ak,” nia haklaken.

Tuir Prezidente CI, jornalista tenke garante ninia integridade di’ak liu no labele aseita sasan sira hanesan ne’e, liuliu simu perdiem no seluk tan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here