Superintendente Lino Saldanha partisipa segundu seminário ba Ofisias Superiores Comunidade Pais Lingua Portugues (CPLP). Imajen/PNTL

DILI, 29 outubru 2019 (TATOLI)- Tuir akordu kooperasaun ne’ebé eziste entre Timor-Leste ho Portugál, ofisiais superiór Polisia Nasional Timor-Leste PNTL na’in rua, Superintendente Arnaldo Araújo ho Superintendente Lino Saldanha, partisipa  segundu semináriu ba Ofisiais Superior  nasaun sira ko’alia lian portugés (CPLP-sigla portugés) iha Guarda Nasionál Republikana (GNR-sigla portugés) iha loron 9 to’o loron 23 outubru, tinan ne’e, ne’ebé envolve ofisiais superior oioin hosi nasaun sira membru CPLP.

Semináriu ne’e hala’o iha sidade Queluz, eskola ida Guarda nian ne’ebé atividade sira kompostu hosi prátika grupu dezenvolvimentu nian, tantu iha organizasaun funsionáriu ne’ebé ho nia karater ka iha grupu planu nian iha parte oin-oin, atu halo atualizasaun ba informasaun no proporsionál atu hato’o ho livremente iha ambiente ne’ebé fó benefísiu atu troka esperiénsia no prepara planu ne’ebé integradu durante loron 13 nia laran ho durasaun oras 76.

Komunikadu Imprensa ne’ebé fó sai hosi Komandu PNTL, ohin, relata katak, matéria  formasaun sira ne’ebé ofisiais Polisia CPLP sira diskute maka haree liu ba problema no prinsípiu sira ne’ebé komún ba forsa seguransa nasaun CPLP nian hanesan, Papél no programa Polisiamentu Komunitáriu no prosimidade iha ámbitu atividade polisiál ninian, prinsípiu sira ne’ebé regula atividade serbisu Forsa Seguransa,  Regime Jurídiku ba Direitus Umanus, Dezafiu prinsipál ba prosesu hodi foti desizaun, prosesu no planu, Prosesu manejamentu rekursu umanu, Importánsia serbisu hamutuk no  halo kooperasaun entre polísia internasionál sira no ikus  maka Jestaun estratéjika.

Sesaun sira iha semináriu ne’e hala’o ho lian Portugés, no ofisiais superior PNTL na’in rua ne’e partisipa iha aula, ezersísiu, debate, serbisu grupu, hala’o estudu ba simulasaun, ho objetivu atu hakle’an kompeténsia no koñesimentu tékniku ne’ebé presiza iha kargu no ba ezersísiu funsaun iha área Komandu, diresaun ka xefia no estadu maiór.

 Jornalista         : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here