Ministru Transporte no Komunikasaun, José Agostinho da Silva. Imagen Egas Cristovao

DILI, 29 outubru 2019 (TATOLI) – Ministru Transporte no Komunikasaun (MTK), José Agostinho da Silva, hateten MTK planeia ona atu halo rekruta ba asesór jurídiku hodi elabora lei atu hafasil kobra reseita.

“Ita iha reseita, mas durante ne’e funsiona limitadu, entaun planu iha tinan oin ita halo rekrutamentu ba asesór jurídiku para bele elabora ita-nia lei, para lei ne’e bele vigora atu ita bazeia ba lei ne’e hodi rekolla reseita”, Ministru José Agostinho iha Parlamentu Nasionál, ohin.

Hodi hatutan iha diresaun administrasaun direita no indireta hanesan Diresaun Nasionál Transporte no Terrestre (DNTT), no diresaun autónoma Ajénsia Nasionál Aviasaun Timor-Leste (ANATL), Autoridade Portuária Timor-Leste (APORTIL) no Autoridade Nasionál Komunikasaun (ANC, sigla portugés).

“Kuandu lei seidauk iha ita halo kobransa ilegál tanba naturalmente MTK rekolla reseita ba kofre Estadu, maibé instrumentu legál laiha ita labele halo buat ida, tan ne’e lei ida ne’e importante”, katak.

Iha tinan ne’e, MTK konsege rekolla reseita hamutuk $6,7-resin hodi hatama ba kofre Estadu no orsamentu ne’ebé mak aloka iha 2019 hamutuk millaun $7,6.

Ministru José Agostinho da Silva, foin lalais ne’e mós hateten prioridade MTK nian ba tinan ida ne’e kontinua hatama reseita ba Estadu.

Iha Orsamentu Jerál Estadu (OJE) 2018, ministériu hetan millaun $2,6, maibé konsege hatama fali reseita ba kofre Estadu millaun $11,1.

Reseita ne’e, mai hosi órgaun sira ne’ebé tutela ba MTK hanesan APORTIL, ANATL, AACTL no ANC.

Nia salienta reseita aeroportu iha kanál hamutuk 22, maibé hahú hosi Governu dahuluk to’o agora foin mak funsiona reseita tolu de’it.

“Kuandu lei ba kanál reseita sira iha ona, projesaun ba reseita doméstika ne’e sei sa’e liután”, Agostinho dehan.

Notísia relevante : MTK Arrekada Reseita Millaun $6,7-Resin

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here