dr. Egio Francisco da Costa de Jesus. Imajen Tatoli/Nelia Fernandes

MANUFAHI, 29 outubru 2019 (TATOLI)—Hahú hosi janeiru to’o iha setembru 2019, moras Infesaun Vias Respiratória no Moras Diareia Simples rejistu aas iha Sentru Saúde Manufahi.

“Durante ne’e pasiente ne’ebé mai halo tratamentu ho moras ne’ebé barak liu mak moras Infesaun Vias Respiratória hamutuk 27649 no Diareia Simples 3944 iha Sentru da Saúde Manufahi,” hateten Doutór Egio Francisco da Costa de Jesus, ba Agência TATOLI iha nia kna’ar fatin, Bairru Nuu-Laran, Suku Letefoho, Postu Administrativu Same, Munisípiu Manufahi, tersa ne’e.

Nia esplika, moras Infesaun Vias Respiratória hada’et husi rai rahun tanba iha Timor ne’e iha konstrusaun ba estrada entaun hamosu rai rahun no tanba mós hada’et hosi família ne’ebé fuma sigaru.

Nia hatutan, moras diareia iha rua. Iha diareia simples no diareia raan. Diareia raan komesa menus daudun ona, tanba programa saúde munisípiu la’o dala barak hodi halo atendementu  ba moras diareia raan ne’e.

“Moras diareia kauza hosi mal alimentasaun, konsume hahán cokolate depois tempu udan ne’e mak hamosu efeitu ba moras refere,” Egio esplika.

Nia mós hateten moras seluk ne’ebé rejistu iha Sentru Saúde ne’e mak moras scabies (infesaun kulit).

Aleinde ne’e, nia dehan, moras tensaun mós rejistadu iha ne’ebá, liuliu iha Same akontese barak mak ema ho idade avansadu moras tensaun tanba falta kontrola saúde.

“Dala barak pesoál saúde fó formasaun esplika katak ema ne’ebé hetan moras tensaun ne’e loroloron tenke hemu aimoruk tanba ita-nia populasaun ne’e falta koñesimentu oinsá prevene moras refere. Sira dehan sira sente moras mak foin mai ospitál. Ne’e mak problema ne’e,” katak Egio Francisco.

Iha parte seluk, Responsável Serviço Municipal de Saúde Manufahi, Florencia Corte-Real Tilman haktuir katak iha ospitál ne’e moras ba labarik no ema boot hanesan de’it, hanesan moras diareia simples, sira (komunidade) mai konsulta depois rekoopera filafali.

Tuir nia, kona-ba aimoruk iha Sentru Saúde Manufahi ne’e kompletu tanba sira serbisu hamutuk ho parseiru husi Fundu Globál hodi fasilita aimoruk.

“Ami iha ne’e moras barak. Ami-nia medikamentu mós kompletu atu atende pasiente sira. Maibé, ba moras sira ne’ebé labele ona no ami halo tratamentu loron haat mak la rekoperadu, ami tenke transfere ba ospitál referrál,” nia informa.

Responsável ne’e tenik katak sira só infrenta difikuldade ba bee-moos tanba la asesu bee-moos durante fulan ida ona.

“Ita haree bailoron ona entaun bee komesa menus. Maski nune’e, ami iha liña koordenasaun di’ak ho bombeiru, tan ne’e bombeiru sempre transporta bee mai ami,” Florencia subliña.

Aleinde moras Infesaun Vias Respiratória no Diareia Simples rejistadu iha Sentru Saúde Manufahi, iha mós moras seluk hanesan moras kulit, scabies, ulkus genital, asidente tráfegu no tee been raan.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here