Prezidente sesante interinu RAEOA-ZEESMS, Arsénio Paixão Bano. Imajen Tatoli/Egas Cristovão.

DILI, 29 outubru 2019 (TATOLI) – Prezidente Interinu Rejiaun Administrativa Oé-Cusse Ambeno no Zona Espesiál Ekonomia Sosiál Merkadu (RAEOA-ZEEM), Arsénio Paixão Bano, rekoñese kriasaun rejiaun ne’e liberta Oé-Cusse hosi izolamentu.

RAEOA-ZEESM mosu hanesan instrumentu ba jestaun ekonomia atu atinji kresimentu dezenvolvimentu iha Timor-Leste, ne’ebé adota husi Lei númeru 3/2014 18 juñu, aprovadu husi Parlamentu Nasionál (PN).

Arsénio haktuir, alokasaun orsamentu dezde tinan 2015 to’o agora ba RAEOA-ZEESM hodi sai hanesan modelu dezenvolvimentu ida.

Dezde kriasaun, Governu Sentrál aloka orsamentu millaun $600 resin no gasta ona millaun $400 resin, liuliu ba Aeroportu Internasionál Rota do Sândalo, ponte, estrada no nesesidade sira seluk.

“Intensaun loloos maka Governu atu hasai Oé-Cusse husi izolamentu tanba Oé-Cusse molok sai rejiaun espesiál, hahú hanesan distritu ida-ne’ebé kiak no izoladu liu. Asesu mai Dili no infraestrutura iha nível distritál defísil tebes”, Arsénio esplika durante audiénsia komisaun konjunta, iha sala plenáriu PN, tersa ne’e.

Nia dehan, molok kriasaun RAEOA-ZEESM, populasaun sira iha Pante Makasar maka bele asesu eletrisidade no estrada, enkuantu Oé-cusse atu asesu de’it ba terrestre no marrítima difísil.

Nune’e Arsénio salienta, iha tinan 2014 no 2015 Oé-Cusse komesa ona sai hosi situasaun izolamentu tanba estrada pakote I no II hahú ona prosesu, inklui aeroportu mós hahú konstrui.

Nune’e mós, iha aviaun ZEESM no ró balun hahú halo operasaun hodi ema hahú vizita ba Oé-Cusse.

“Halo Oé-Cusse hanesan rejiaun ida animadu no agora situasaun ne’e muda oituan, hahú 2018 ba kraik ami iha kondisaun di’ak tanba iha ema barak servisu no atividade ekonómika iha merkadu funsiona”, nia akresenta.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here