Jardín Motaél, 12 de Novembro ne’ebé sei muda naran ba Jardín Sebastião Gomes Motaél. Imajen Tatoli/Cipriano Colo

DILI, 28 outubru 2019 (TATOLI) – Komité 12 de Novembro (K12N) triste ho promesa Governu ne’ebé atu muda naran Jardín Motaél, 12 de Novembro ba Jardín Sebastião Gomes Motaél, maibé to’o oras ne’e seidauk realiza. 

Iha loron 17 setembru, ekipa K12N hasoru malu ho Ministru Turizmu, Komérsiu no Industria interinu, Fidelis Manuel Leite Magalhães, hodi hato’o preokupasaun Komité kona-ba naran ba Jardín Motaél.

Nune’e, iha momentu ne’ebá Ministru Fidelis orienta ona ekipa tékniku minitériu atu koordena ho kompañia ne’ebé kaer obra jardín hodi bele muda naran.

Notísia Relevante: Governu Deside Muda Naran Jardín “12 de Novembro Motael” ba “Sebastião Gomes”

Prezidente K12N, Gregório Saldanha, hato’o sentimentu triste ne’e, liu-hosi Konferénsia Imprensa ne’ebé realiza iha Igreja Motaél, ba selebrasaun tinan 28 Saudozu Sebastião Gomes ninia mate (28 outubru 1991), segunda ne’e.

“Ami triste tanba ohin ita komemora loron mate Saudozu Sebastião Gomes, tuir loloos naran ne’e troka ona, tanba hanesan promesa husi Governu. Ami mós nunka fó ultimatum atu tenke troka lalais maibé ami husu de’it atu tau loloos istória iha ninia fatin”, hateten Gregório.

Tuir Mate Restu Masakre 12 de Novembro ne’e, istória tenke hatuur loloos atu nune’e bele hanorin jerasaun foun sira kona-ba istória akontesimentu.

Nia dehan, husi parte Governu maka promete katak antes loron 28 outubru sei muda naran jardín.

“Infelizmente to’o agora seidauk troka. Ha’u la hatene razaun saida maka to’o agora seidauk muda, maibé ita depozita nafatin konfiansa ba Governu tanba ha’u fiar katak sei muda”, nia akresenta.

Jardín Motaél ne’ebé sei tau naran Jardín Sebastião Gomes Motaél, konstrui husi kompañia ALGIS Engineering, Lda, ho totál orsamentu $95.009 no durasaun ba konstrusaun fulan tolu.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here