Xanana Gusmão vizita Portu Tibar hodi enkoraja traballadór kompañia China Harbour kontinua hala’o serbisu ba projetu Portu Tibar hafoin loron ida liu halo intervensaun ba disputa rai Kaitehu ne'ebé kompañia Marino Entreprises reklama dehan ninian. Imajen/Eugénio Pereira

DILI, 29 outubru 2019 (TATOLI)-Tribunal Distritál Dili (TTD), ohin, suspende audiénsia julgamentu ba kazu disputa rai Kaitehu, tanba  seidauk hetan junta dokumentu hosi Diresaun Nasional Terra no Propriedade (DNTP) Ministériu Justisa.

Notísia Relevante : China Harbour Hatama Ona Nia Opozisaun ba “Providénsia Kautelar” iha TDD

Rai balun iha Kaitehu, Postu Administrativu Bazartete, Munisípiu Liquiça, tama iha disputa entre kompañia Marino Enterprises ho kompañia Internasionál China Harbour ba projetu produsaun britas (kerikil) ne’ebé fornese ba mega projetu Portu Tibar.

Juiza titulár  Maria Modesta, deklara iha audiénsia julgamentu, katak, tuir loloos prosesu ba loron ohin atu rona sasin hosi China Harbour, maibé Tribunal suspende tanba Tribunal seidauk hetan junta dokumentu hosi DNTP atu fasilita prosesu justisa ida ne’e. Tanba ne’e, TDD fó prazu loron lima (5) ba DNTP atu bele hatama junta dokumentu hodi fasilita Tribunal kontinua halo aúdensia julgamentu ba kazu refere.

Notísia Relevante : Disputa Rai Kaitehu, MJ Promete Sobu “Mafia” Justisa

Advogadu kompañia Marino Enterprises, Pedro Aparício informa, prosesu ne’e tribunal tenke suspende tanba tribunal seidauk  hetan junta dokumentu hosi DNTP kona-ba mapa lokalizasaun terrenu ho rai komunidade ne’ebé sukat tiha ona antes.

TDD fó ona prazu loron lima ba DNTP atu kompleta dokumentu maka tribunál sei halo julgamentu ba iha prosesu kazu disputa rai Kaitehu  entre kompañia Marino Enterprises ho kompañia internasionál China Harbour ne’ebé hetan intervensaun hosi Estadu.

Iha sala julgamentu, Pedro Aparício hato’o nia rekerimentu hodi husu tribunal atu foti uluk desizaun ba iha embargo terseiru, depois maka kontinua fali ba iha prosesu providénsia kautelar.

Pedro Aparício, konfesa katak, prosesu embargo terseiru sira la dun iha koñesimentu, tanba la hetan notifikasaun kona-ba ida ne’e. Iha fulan setembru maka hosi parte rekerente nian, halo justifikasaun de’it. Tanba ne’e nia parte mós husu atu deside uluk embargo terseiru depois maka deside fali prosesu providénsia kautelar.

Iha sala julgamentu, Juiza Maria Modesta, afirma tan,  tribunal seidauk deside no notifika hosi parte rekerente no rekerridu nian, tanba foin tama iha prosesu dilijénsia no despaixu husi tribunal haruka ba iha DNTP  seidauk iha resposta, tanba ne maka tribunal la notifika ba parte sira.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here