Prezidente Komité 12 de Novembro, Gregório Saldanha. Imajen Tatoli/Egas Cristovão

DILI, 29 outubru 2019 (TATOLI) – Prezidente Komité 12 de Novembro (K12N), Gregório Saldanha, husu ukun na’in sira atu preokupa de’it dezenvolve povu nia moris, la’ós preokupa ho Eleisaun Antesipada.

“Se hakarak Eleisaun Antesipada, ita sei gasta osan barak. Ne’e ita sei sai hanesan loloos Paises Africanos de Língua Oficial Portuguesa (PALOP). Governu ida sa’e, monu fali no ida troka, repete nune’e hela de’it. Se ita nune’e nafatin bainhira lós mak Timór bele dezenvolve”, Gregório hateten liuhusi konferénsia imprensa hodi komemora loron mate Saudozu Sebastião Gomes, iha Igreja Motaél, tersa ne’e.

Nia dehan, líder sira laiha ida maka foin mosu mai Timór no sira hamutuk hela de’it, tanba ne’e sira koñese no kompriende malu didi’ak.

“Ita husu ba sira atu ko’alia ba malu hodi rezolve problema raí laran tanba ida-ne’e maka sai preokupasaun boot.

Sobrevivente Rezisténsia ne’e rekoñese katak, Konstituisaun Repúblika Demokrátika Timor-Leste (K-RDTL) garante Eleisaun Antesipada, maibé tenke hatene no tetu didi’ak tanba sei gasta osan barak.

“Gasta osan barak hodi dezenvolve povu nia moris iha valór boot liu kompara ho gasta osan hodi halo Eleisaun Antesipada. Aleinde ne’e, atu realiza eleisaun sei presiza tempu lubuk ida”, nia akresenta.

Maske nune’e, nia dehan kestaun ne’e depende mós ba autoridade kompetente sira ne’ebé iha podér ba desizaun maka iha kompeténsia atu deside.

Antes ne’e, Primeiru Ministru, Taur Matan Ruak hateten, Governu kontinua negosia ho Prezidente Repúblika, Francisco Guterres ‘Lú Olo’ hodi deskute no buka dalan ba membru governu indijitadu na’in-sia atu bele hetan pose, maibé bainhira laiha dalan no ema hotu hakarak, bele hakat ba Eleisaun Antesipada.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here