Diretór CEFTEC, Luís Evaristo Soares. Imajen/TATOLI

DILI, 29 outubru 2019 (TATOLI) – Diresaun Nasionál Sentru Formasaun Teknika iha Komunikasaun (CEFTEC-sigla portugués) realiza workshop iha salaun Tower, Fatuhada, hodi halo avaliasaun no haree efetividade implementasaun formasaun ne’ebé la’o durante ne’e.

“Avaliasaun ida ohin ne’e importante tebes tanba atu hatene durante iha formasaun ne’ebé CEFTEC fó, ninia efitividade to’o iha ne’ebé. Sera que sira (formandu) fila hosi formasaun bele fó  apoiu ka aumenta dezempeñu iha sira ninia servisu fatin ka lae. Ho hanoin sira ne’e maka ita iha hanoin ida atu halo avaliasaun jerál”, tenik Diretór CEFTEC, Luís Evaristo Soares.

Nia dehan, bainhira iha avaliasaun jerál maka bele hatudu katak formandu sira ne’ebé durante ne’e tuir formasaun bele aproveita di’ak ka lae, nune’e mós bele identifika problema.

“Espera katak ho avaliasaun ne’e iha mudansa no revizaun balun ne’ebé sei halo, liuliu ba iha modu formasaun sira ne’ebé durante ne’e iha,” nia akresenta.

Diretór ne’e observa, liuhosi formasaun ne’ebé CEFTEC hala’o iha tinan barak nia laran, konsege iha ona progresu sufisiente tanba formandu barak bele implementa buat ne’ebé sira hetan iha fatin servisu.

“Ba implementasaun formasaun sira, ami mós halo kontaktu ho pesoál kargu xefia sira hosi liña ministeriál sira, liuliu sira ne’ebé maka haruka sira nia ema tuir formasaun.

Nia subliña, iha opiniaun diferente tanba balun implementa duni iha sira ninia servisu fatin hanesan bele hakerek konunikadu imprensa no seluk tan.

“Entaun sira hahú implementa ona regra etíka hakerek nian tuir saida maka sira hetan iha formasaun. Maibé balun sei pasivu hela, entaun ita tenke halo avaliasaun ida ne’e hodi haree modul sira ne’e hodi ajusta ho situasaun agora ka lae,” nia dehan tan.

Luís Evaristo hatutan, CEFTEC komprometidu iha tinan oin sei estandariza ekipamentu hotu ne’ebé maka atu uza halo prátika iha formasaun loron-loron nian.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here