Manán-na’in prémiu esportasaun TradeInvest 2019 iha kategoria star up business, Mariano da Costa, na’in ba Empreza Kafé Orgánika Atsabe. Foto/Natalino Costa.

DILI, 29 outubru 2019 (TATOLI) – Na’in ba Empreza Kafé Orgánika Atsabe, Ermera, Mariano da Costa Alves, afirma atu susesu iha futuru la fásil hanesan ita ko’alia, nune’e tenke brani hasoru dezafiu, tanba susesu ne’e aktu espontáneu ne’ebé akontese ba ema atu atinje objetivu ida.

“Ita atu susesu ne’e la fásil hanesan ita ko’alia, maibé ita sei liu prosesu obstákulu no dezafiu sira, tanba ne’e ita brani hasoru dezafiu karik ita hakarak susesu tanba susesu ne’e la’ós ita tuur, maibé nia mai hanesan espontánea”, tenik nia ba Ajénsia Tatoli iha serimónia atribuisaun Prémiu Esportadór 2019 ne’ebé organiza husi TradeInvest Timor-Leste foin lalais ne’e iha Timor Plaza.

“Esperiénsia ne’ebé ha’u hetan tanba ha’u uluk hanesan funsionáriu barista iha Kafé Letefoho hamutuk ho ha’u-nia kolega na’in-haat, ami maka hanesan funsionáriu primeiru, ha’u serbisu tinan barak no rezigna-an iha 2017”, dehan Mariano Costa.

Tanba ne’e, Mariano Costa koko halo negósiu ki’ik ida liuhosi prosesamentu kafé orgánika tanba haree ba kuantidade kafé hosi família nian sa’e. Ho atividade negósiu ne’e atu enkoraja joven sira katak tempu ona atu filafali ba vida agrikultura hodi halo diversifikasaun ba setór agríkola, labele hein de’it oportunidade mai hosi Dili.

“Ha’u-nia hanoin, ida ne’e atu enkoraja joven sira, ita labele tuur de’it maibé halo saida maka ita bele halo hanesan agrikultura nian no seluk, tanba susesu la’ós ita tuur de’it maibé presiza esforsu no brani hasoru dezafiu sira”, katak.

Tuir nia, halo planu negósiu ho fundu $750, dahuluk nia estabelese fatin prosesamentu kafé nian, sona kafé, depois tau iha bote hodi ba fa’an iha merkadu.

Negósiu ne’e konsege fa’an nia rezultadu kafé iha merkadu ho grama 250. Hanesan kafé nia fuan ho presu $3.50 to’o $4.50. Enkuantu tinan kotuk konsege prodús tonelada ida ho balun no tonelada ida esporta no tonelada balun uza de’it.

Enkuantu, tinan ida ne’e, nia prepara tonelada 20-resin no tonelada 19 konsege esporta ona, tonelada rua rai iha uma hodi order ba merkadu lokál sira.

Kafé Orgánika Atsabe konsege esporta ona ba Austrália, Nova Zelándia no Xina, aleinde ne’e husi parte Kooperativa Kafé Timór (CCT, sigla portugés) hola tutan hafoin esporta ba Estadu Unidu Amérika.

Esforsu sira ne’e maka lori Mariano Costa hanesan na’in ba empreza Kafé Orgánika Atsabe ne’ebé manán prémiu anuál esportasaun TradeInvest 2019, iha kategoria Star Up Business no konsege hetan osan montante $500.00 ne’ebé oferese fó husi Jackson Lay.

Aléinde ne’e, iha mós manán-na’in hanesan empreza Acelda iha kategoria diferente hanesan exepsionál esportadór 2019 no Empreza Farm Pro maka sai manán ba kategoria esportadór potensiál.

“Ha’u sente orgullu hanesan foin-sa’e ida ne’ebé maka iha hanoin no iha inisiativa bele halo negósiu iha setór produtivu, nune’e mós orgullu ba atividade ne’ebé maka TradeInvest halo tanba bele motiva ha’u hodi fortifika ha’u-nian negósiu ne’ebé halo daudaun ne’e”, nia orgullu.

“Ha’u promete sei dezenvolve di’ak liután produsaun kafé orgánika ne’ebé halo daudaun hanesan halo transformasaun hodi hola sticker atu fa’an ba merkadu sira ho kualidade”, kompromete.

Mariano Costa hanesan joven inovadór promete sei kria fatin turístiku hanesan halo guest house tradisionál iha Atsabe.

Empreza Kafé Orgánika Atsabe iha funsionáriu hamutuk 39, kontratadu hamutuk na’in-36 no rua permanente no ida maka voluntáriu.

Notísia relevante : Empreza Nasionál Tolu Sai Manán-Na’in ba Prémiu Esportadór TradeInvest 2019 

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here