Sesaun plenária Parlamentu Nasionál. Imajen dok. Tatoli

DILI, 29 outubru 2019 (TATOLI) – Membru Parlamentu Nasionál (PN) bainhira halo audiénsia konjunta ho Rejiaun Administrativa Espesiál Oé-cusse Ambeno no Zona Espesiál Ekonomia Sosiál Merkadu (RAEOA-ZEESMS) no Ministériu Transporte no Komunikasaun (MTK), preokupa maka’as ho alokasaun orsamentu 2020 ne’ebé prevee ba viajen estranjeiru.

Deputadu Bankada Congresso Nacional Reconstrução de Timor (CNRT), Gabriel Soares, preokupa orsamentu montante boot ba Rejiaun Espesiál ne’ebé aloka ba de’it viajen estranjeiru.

“Ha’u haree hetan iha ZEESM nian, aloka orsamentu $50.000 atu halo viajen estranjeiru. Labele halo konfuzaun, di’ak liu hapara dala ida kedas”, tenik Deputadu Gabriel iha sala plenáriu PN, tersa ne’e.

Tuir Deputadu Bankada Governu ne’e, presiza haree didi’ak alokasaun orsamentu tinan oin ba deslokasaun estranjeiru tanba iha buat importante seluk maka presiza trata.

“Ami husu atu kansela orsamentu viajen nian tanba orsamentu 2020 ba Parlamentu laiha verba ba viajen estranjeiru. Viajen ami nian kansela no laiha toleránsia ba deputadu sira hotu ”, nia akresenta.

Nune’e mós, Deputadu Bankada Frente Revolusionária Timor-Leste  Independente (FRETELIN), Mariano Mota, kestiona maka’as orsamentu 2020 MTK ba viajen estranjeiru.

“Ha’u hanoin Ministru Transporte no Komunikasaun hatene hotu ona kona-ba orsamentu viajen rai liur ba deputadu sira. Ami konkorada konsentra ba viajen lokál, tanba ne’e orsamentu viajen estranjeiru laiha ona no tenke ko’a”, dehan Deputadu Bankada Opozisaun ne’e.

Nia observa, alokasaun orsamentu 2019 ba MTK prevee ba viajen estranjeiru hamutuk $107.000, enkuantu iha orsamentu 2020 husu hasa’e to’o $175.000.

“Ha’u presiza ita boot sira esplika ezekusaun orsamentu 2019 ba viajen estranjeiru. Iha boot sira halo estudu komparativu saida ona iha ne’ebá (rai liur) no atu implementa iha tinan 2020 ne’e? Agora iha 2020 atu husu tan viajen estranjeiru, se ita boot sira bainhira halo ona estudu iha tinan kotuk, presiza atu konsentra iha implementasaun. Agora husu atu aumenta sa’e tan $75.000 ba de’it viajen rai liur”, nia kestiona.

Nune’e, nia husu MTK tetu didi’ak antes atu hala’o viajen ba rai liur.

“Ha’u husu imi tetu didi’ak ho hanoin ida katak despeza sira ne’ebé sai tenke fó retornu ba ministériu tanba orsamentu tinan ida ne’e boot tebes iha períodu governasaun VIII Governu nian”, nia dehan tan.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here