Diretor Operasaun AIFAESA, I.P. Imajen TATOLI/Antónia Gusmão.

DILI, 29 outubru 2019 (TATOLI) – Diretór Operasionál Autoridade Inspesaun no Fiskalizasaun ba Atividade Ekonómika Sanitária no Alimentár (AIFAESA), Gabriel da Costa, rekoñese katak labarik sira hili duni sigarru ne’ebé ekipa AIFAESA ho empreza LISUN halo destruisaun iha lixu fatin Tibar.

Maibé, Diretór Operasionál ne’e klarifika katak, sigarru ne’ebé labarik sira hili seidauk liu prazu, no produtu ne’e hosi empreza LISUN maka hakarak sunu.

“Situasaun ne’e akontese dala barak ona iha tinan sira liubá kuandu AIFAESA halo destruisaun ba produtu sira apreendidu (foti) ne’e sempre halo tuir regra sira ne’ebé estabelese ona hanesan kee rai-kuak no tau sasán sira ne’e no sunu to’o uut depois taka metin tiha maka ami fila, maibé hanesan situasaun sira akontese katak bainhira ami fila komunidade sira maka ba ke’e fali hodi foti sasán sira ne’e no sira hatete katak sira-nia moris mak mai hosi fatin sira hanesan ne’e”, dehan Gabriel iha Matadouru, ohin.

Gabriel dehan, baibain sira atu bá halo destruisaun produtu apreendidu to’o iha lixu fatin Tibar, seguransa iha fatin refere maka hatudu fatin hodi halo destruisaun, no akompaña mós hosi autoridade seguransa.

“Kona-ba sigarru ne’ebé labarik sira hili ne’e kompañia rasik dehan seidauk liu prazu, maibé sira maka deside halo destruisaun para importa foun fali”, dehan Gabriel.

Diretór ne’e esplika katak antes atu sunu sasán sira ne’e, bá uluk observa rai-kuak ne’ebé atu tau produtu sira, no loron tuirmai mak bá sunu.

Durante sunu sasán sira ne’e, ekipa AIFAESA hamutuk autoridade sira hein to’o mutuk maka foin bele fila. “Foin lalais sunu ne’e, iha de’it Polísia Komunitáriu ida maka akompaña, ha’u orienta ekipa AIFAESA katak prosesu ne’e sunu mutuk tiha maka fila, maibé akontese fali situasaun ne’e, ne’ebé ha’u sei halo konfirmasaun ho inspetór sira tanba situasaun ne’e bele fó impaktu ba komunidade sira”, haktuir Gabriel.

Relasiona ho kestaun ne’e AIFAESA rekomenda ba Ministériu Administrasaun Estatál (MAE) atu deside fatin lixu nian ida ne’ebé dook hosi komunidade.

Foin lalais ne’e, AIFAESA ho empreza LISUN halo destruisaun ka sunu mutuk sigarru iha Tibar, maibé ahi la konsege han hotu, nune’e abitante balun inklui labarik sira aproveita sigarru hodi konsome no balun fa’an filafali.

Labarik ki’ik kuaze liu na’in-10 ho kontente hala’o atividade kee fili rai-kuak hodi foti sigarru ne’ebé halo ona destruisaun ka sunu mutuk, maibé ahi la konsege han hotu nune’e sira rekolla lori bá fa’an.

Francisco Miguel (10) ho Mariano de Lima Gomes (8) haktuir, sigarru ne’e AIFAESA no Kompañia LISUN maka ba soe no sunu iha kuarta (23/10/2019) .

Labarik rua akompaña ho sira-nia kolega taka oin metin ne’e dehan, rai-kuak ne’ebé autoridade sira kee ladún naruk no kuantidade sigarru barak liu.

“Ami ho maun sira mai haree sigarru ema mai sunu la hotu. Tanba ne’e, dezde kinta to’o sesta ohin (23/10), ami kee filafali rai-kuak hodi hasai sigarru balun tomak hela hamoos lori ba fa’an filafali masu ida  $0,50 to’o $1,00 no balu slop no kaixa tomak ema sosa hotu. Tanba ne’e loron rua ona ami mai kee hodi foti sigarru balun sei tomak no moos hela”, hateten Francisco Miguel ba Ajénsia TATOLI iha Lixu Tibar foin lalais ne’e.

Rai-kuak ne’ebé parte autoridade sira kee ladún naruk, nune’e bainhira halo tiha destruisaun ahi la konsege han sigarru to’o hotu, nune’e mós rai-kuak ne’ebé la taka, fó oportunidade ba komunidade hodi foti sigarru ne’ebé sei ho kondisaun di’ak.

Bazeia ba dadus ne’ebé fó sai husi AIFAESA, sigarru husi empreza LISUN nian ne’ebé halo destruisaun ho marka DUNHIIL ne’e ho kuantidade kaixa 421.50 no slop hamutuk 21.075.

Razaun kompañia LISUN foti hodi halo destruisaun tanba kualidade husi sigarru ne’e la tuir ona padraun sigarru ne’ebé di’ak.

Notísia relevante : Labarik Hili Sigarru Liu Prazu iha Lixu Tibar ba Fa’an Fali

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here