Koordenadór AIFAESA, Abilio Oliveira Sereno. Imajen/Egas Cristovão

DILI, 29 outubru 2019 (TATOLI)- Autoridade Inspesaun no Fiskalizasaun Ba Atividade Ekonómika, Sanitária Alimentár, Institutu Públiku (AIFAESA,I.P), ohin, hala’o enkontru koordenasaun ho Komandu Polisia Munisípiu Dili atu bele asegura ekipa AIFAESA bainhira halo inspesaun ba atividade ekonómika no kontrolu ba kualidade ai-han.

Notísia Relevante : MAP Sei Kolabora ho AIFAESA Kontrola Hahán Lata Ne’ebé Fa’an iha Loja

Koordenadór AIFAESA, Abílio Oliveira Sereno dehan, koordenasaun serbisu ne’e importante hodi PNTL bele ajuda buka solusaun ba atividade ekonómika sira ne’ebé bele implika ba krime públiku.

AIFAESA rasik durante ne’e hasoru obstákulu bainhira halo operasaun ba loja no kioske balun iha Dili no munisipiu identifika ema fa’an sasán nesesidade báziku no bebida balun liu prazu, maibé negosiante ka loja nain sira lakohi koopera ho AIFAESA bainhira atu foti sira nia sasán.

Notísia Relevante : AIFAESA Husu MKAE Tau Importánsia ba Lei Regula Bebida Alkólika

Abilio Sereno dehan, durante ne’e serbisu entre parte rua la’o di’ak tebes maibé presiza iha komunikasaun ne’ebé di’ak, hodi nune’e bele garante serbisu inspesaun nian ba infrasaun sira ne’ebé operadór sira kontinua komete.

AIFAESA ho PNTL mós ko’alia kona-ba dezafiu ne’ebé parte rua kontinua hasoru, mak laiha kondisaun ba peskiza laboratóriu iha terrenu atu garante kualidade ai-han nune’e la fó impaktu ba konsumidór sira nian saúde.

AIFAESA ho PNTL deklara iha ona pesoál sira ne’ebé kapasitadu akadémiku ho kursu profisionalizmu nian, ne’ebé durante ne’e estadu fasilita liu husi formasaun sira.

Komandante PNTL Munisípiu Dili, Superintendente Xefe Armando Monteiro dehan, PNTL prontu atu asegura seguransa ba AIFAESA hodi  hala’o nia knaar tuir lei.

Superintendente Armando hato’o agradese ba AIFAESA hodi vizita ba sira nia kria koordenasaun serbisu kontrolu atividade ekonómika sira ne’ebé kontinua la kumpre ba regulamentu sira, liga ba lisensiamentu, kualidade no kumprimentu ba lejizlasaun.

Jornalista : Eugénio Pereira

Editór       :  Francisco Simões

HAKEREK NO HATÁN

Please enter your comment!
Please enter your name here